Agartala, Iaiong 20 :U Myntri ba dei khmih ia ka tnat Animal Resources Development Department (ARDD) ka sorkar Tripura u Sudhangshu Das hynnin ka sngi u la dawa na u Myntri Rangbah (CM) ka jylla u Dr Manik Saha kumjuh na u Director General of Police u Amitabha Ranjan ba kin shim ka jingpynshitom kaba tyngeh pyrshah ia ki katto katne ki bor pulit kiba donkti ha ki kam khaii masi beain ha ka jylla.
Kane ka jingpynpaw jong une u Myntri sorkar ka la wan long hadien ba u la sakhi ia kawei ka kali bolero kaba kit ia ki masi ha ka rukom ka bym dei bad kaba long beain.
“Nga dang don ha ka lynti sha Ambassa ha Dhalai district ban leit iashim bynta ha kawei ka prokram hadien ba Nga la sakhi ia uwei u briew uba kit ia kumba 12 tylli ki masi hapoh kali ka kali bolero kit mar kaba rit.Ngi la pynieng ia kane ka kali bad bishar ia ki kot ki sla ha kaba la kdew halor ka jingdon 13 tylli ki masi.Hynrei, ngi la ioh pdiang shibun ki jingujor ba kito ki briew kiba ju kit ia ki masi ki dei ki ju tuh ia ki masi na ki lynti surok kumjuh.Kumta ruh ngam artatien ban pynpaw ba ki don ki bor pulit kiba donkti ha ki kam khaii masi beain kumba Nga la sakhi mynta ba kane ka kala kala iaid lyngba kiba bun tylli ki jaka ap pahara.Hynrei, kumno ki pulit kin pyllait ia kane ka kali khlem da bishar bniah,” ong une u Myntri.
Da kaba dawa ban shim ia ki sienjam kiba tyngeh, une u Myntri u la ong; “Nga kwah ban kyrpad ia u CM Sarma uba dei ruh u myntri ka tnat kam pohiing kumjuh ia u DGP ba kin pynlong ka jingtohkit kaba bniah halor kane ka bynta bad ban shim ka jingpynshitom pyrshah ia kito ki pulit kiba donkti ha kiba kum kine ki kam beain.Ngam don kano kano ka jingujor lada kino kino ki leh ia ki kam khaii masi, hynrei kin hap ban leh da kaba bud ryntih ia ki kyndon ain.”
Kum u Myntri ka tnat ARDD ka dei ka jingkitkhlieh ka jong nga ban aijingiada na ka bynta ki jingim jong kine ki jingri, bad dei nas kane ka daw Nga la phah pynieng ia katei ka kali namar ka rukom thep bad ka jinglong jong kitei ki jingri ka long kaba i shitom shibun ha kaba kum katei ka jinglong jingman.
