Imphal, Nailar 28: Ki seng bhalang jong ki Naga ki la mih bad dawa ban pynlong ia ka jingtohkit kaba laitluid, ban kem ia kiba donkti bad ban pynkhlain ia ki lad pahara hadien ka jingshah hiar thma kynsan ha surok Imphal-Tamenglong ha Manipur, kaba la shim ia ka jingim ki 5 ngut ki paidbah Naga ha ka 27 tarik u Nailar.
Katkum ki heh ophisar, la iathuh ba ia ki met iap jong ki saw ngut ki riew paidbah Naga, kiba la iap ha ka jingshah hiar thma kynsan ha ka District Kangpokpi jong ka Manipur, la rah ha ka step jong ka sngi Thohdieng, shisngi hadien katei ka jingshah thombor.
Kine ki saw ngut ki la iap bad uwei pat u la mynsaw hadien ba ki riew thrang snam ki la hiar thma ia kawei ka kali ha ka jaka ba kynjah hapdeng ka shnong Makui Ashang bad Thanamba Naga ha ka por kumba 8.30 baje mynstep jong ka sngi Palei.
Kitei ki lanot kidei kiba la tip kyrteng kum u Tadsongbou Ringkangmai uba dei u nongseng bad u principal jong kawei ka skul shimet, u M Wijunamai, u Anil Wijunamai, bad u Wisobou Charenamai uba dei u chairman ka shnong Chawangkining. Utei u briew uba la mynsaw la tip kyrteng kum u Gaikamang Ringkangmai.
Baroh 5 ngut kiba la shah pyniap ki dei na ka jaidbynriew Liangmai Naga.
Ha ka jingpynbna, ka United Naga Council (UNC), ka bor synshar shnong Makui bad ka Chandel Naga People’s Organisation (CNPO) ki la kyntu ïa ka sorkar Manipur bad ki bor pynïaid aiñ jong ka sorkar pdeng ban thaw ïa ka Special Investigation Team (SIT) ban lap ïa ki jinglong jingman jong ka jingshah thombor bad ban ithuh ïa kito kiba donkti.
Kane ka kynhun ka la dawa ruh ban kem kloi ia ki nongleh kam sniew bad ki nongialam ba la kynnoh ba ki donkti ha katei ka kam thombor, nalor ba dei ban kham pynkhlaiñ ia ki lad pahara ban iada ia ki riew paidbah Naga kiba iaid lyngba ka Kangpokpi District.
Ka UNC ka la batai ia katei ka jingjia kum ka “jingbymlah ban iada kaba pura”, da kaba kynnoh ba ki lehnoh kiba don tiar ialeh kiba khlain bor ki la lah thombor ia ki riew paidbah kiba iaid ha surok.
Hadien kitei ki jingshah pyniap, u Myntri Rangbah ka jylla u Y Khemchand Singh u la pyniaid ia ka high-level security meeting bad bthah ia ki bor pahara ba kin wad, kem bad leh eiei pyrshah ia kiba donkti ha katei ka kam thombor.
Kane ka jingjia ka la pynmih ïa ki jingsngewkhia halor ka jingïada ïa ki riew paidbah ha shilynter ka surok IT, khamtam eh hapdeng ki jaidbynriew Naga kiba shaniah ha ka lynti na ka bynta ka leit ka wan bad ka jingleit jingwan man ka sngi.
Kum ka jingpyrshah ia katei ka jingjia bad kum ka dak jong ka jingsngewsih, ka Naga Peoples Organisation (NPO) ka la khot ban khang noh mardor ia baroh ki dukan bad ki jaka khaii pateng kiba don ha Senapati District Headquarter (DHQ).
Kane ka jingjia ka wan hadien shisngi ba la pynlong ïa ka high-level meeting ha Senapati ban bishar bniah ïa ka jinglong jingman jong ka jingshngaiñ kaba mynta bad ban ïakren ïa ki lad ki lynti ban pynneh pynsah ïa ka shongsuk shongsaiñ ha katei ka thaiñ.
U Synbud Myntri Rangbah ka jylla u Losii Dikho u la ïakynduh ïa ka kynhun ba la ïalam da u president ka United Naga Council (UNC) u N. G. Lorho.Ha kane ka jingiakynduh la don lang u MLA ka Thanga u Thongam Robindro, ki heh ophisar, bad ki briew na ka tnad CRPF, Assam Rifles bad ki pulit na Senapati.
Ki jingiap, kaba la jia tang shisngi hadien ka jingialang jong ki bor pahara, ki la buh biang sa shisien ia ki jingpynbeit bor pahara ha shilynter ka surok IT hapoh ka jingpeit bniah.La khmih lynti ba ka jingsngewkhia kan nang kiew hapdeng ki nongshong shnong bad ki nongleit nongwan kiba pyndonkam ia katei ka lynti.
Katba ka jingthwet ia u Visobou Charenamai uba la shah kynnoh ba u la jah rngai naduh katei ka jingjia, la khmih lynti ba kan dang iaid shakhmat.
