Imphal, Nailar 13 : Ka Committee ki seng kynthei ka Manipur kala byrngem ban pynlong ia ka jingiakhih paidbah ha ka sngi rakhe ia ka Independence Day (15 tarik Nailar) lada ka Sorkar Manipur kam lah ban kem hapoh ka 14 tarik Nailar, ia ki briew kiba leh beijot paidbah ia kawei ka Longkmie ba 37 snem ha Churachandpur.
Ha ka sngi thohdieng, ka kynhun ki nongialam jong ki seng kynthei bapher bapher kila pynbna ia ka jingthaw ia ka Committee da ka jingthmu ban pynioh ia ka jingbishar kaba hok ia ki kynthei kiba lait im na ka jingshah leit beijot paidbah.
Ka Aheibam Premila, nongaiktien ka Committee kala ong “ Ngin pynlong ia ka rally paidbah ha ka 15 tarik Nailar lad aka Sorkar kam lahban kem ia baroh ki briew kiba leh beijit ha Churachandpur hapoh ka 14 tarik Nailar”.
Kala ong ba ka Committee ka pynrem jur ia ka kam leh beijot paidbah ia ka Longkmie kaba jia ha ka 3 tarik Jymmang,ka sngi ba nyngkongeh ba khie ka thma iapher jaidbynriew ha Churachandpur District.
Kane ka jingjia shah leh beijot paidbah kala mih pyrthei hadien ba kawei ka Longkmie ba 37 snem ka rta, kala leit ban ujor ejaharsha ki Pulit ha Bishnapur myn ha ka 9 tarik Nailar. Kane ka Longkmie kala kynnoh ba kala shah leh beijot haki paidbhur ha ka janmiet 3 tarik Jymmang katba ka dang phet nala iing hadien ka jingshah wiangding ha ki paidbhur.
