Shillong, Jylliew 28: U Symbud Myntri Rangbah ka Jylla Bah Prestone Tynsong ula pyntip ba ka Sorkar Jylla kala dep ban mang ia ka pisa ba T. 18 klur na ka bynta ban tei ia ka Mini Secretariat ha Civil Sub-Division ha Pynursla.
Haba iakren bad ki nongthoh khubor, u Bah Prestone ula ong ba ia kane ka pisa ba T. 18 klur yn pyndonkam ha kaba tei ia ka Mini Secretariat, ka quarter jong ka MCS, SDSEP Civil bad ki Nongtrei. U pyntip ba ka Sorkar kala dep ban ithuh ia ka jaka bala ai da ka Raid Shabong.
Haba kynthoh ia ki jingkynnoh ba ka Pynursla Civil Sub Division kam treikam satia, u Bah Prestone ula ong ba watla ka long kaba donkam ban pynjanai bad kyntiew kyrdan ia ki katto katne ki Tnad, hynrei ka Civil Sub Division kala treikam pura bad baroh ki Tnad kila don kynthup ka Ophis u SDO Civil, ESC, Supply & Registration for Land, ST Certificate bad kiwei kiwei.
“Ka long kaba bakla ban kynnoh b aka Pynursla Civil Sub Division kam treikam naba ki paidbah kila ioh jingmyntoi bha ha kiba bun ki liang lyngba kane ka Division. Hynrei nga ban biang ba ka dang donkam ban pynjanai bad ka Sorkar ka dang pynkhreh ban wanrah shuh shuh ia bun ki tnat ba kan long ka Civil Sub Division ba pura” ula ong.
Haba kylli, u Bah Prestone ula ong ba ia mynta, ka Sorkar kala dep khot ia ka tender ban tei ia ka Mini Secretariat ha Civil Sub Division Pynursla bad da ka jingpyndep ia kane ka Mini Secretariat, ka Civil Sub Division kan don lut ia baroh ki Tnad Treikam ha kawei ka tnum ban ai ka jingshakri ia ki paidbah.
