Shillong, Rymphang 21 : U Myntri ka Tnad Pule Puthi Rakkam A Sangma ha ka sngi Balang, ula pyntip ba ka Sorkar Jylla kala pyniaid shaid shaid ia ki jingpynkhreh baroh ban pynlong ia ka Captain Williamson Sangma State University kaba treikam.
Haba jubab hapoh Iingdorbar, u Rakkam ula ong ba ka Sorkar kala pynkhreh mynta ban mang sa 100 tylli kikam nonghikai ha Tura bad 6 tylli ha Shillong Campus.
Ka jingmang pisa ban pynlut ia kane ka long T.45.7 klur shisnem.
Ula pyntip ba ka kam ban thung ia u Vice Chancellor jong ka State University kala jan poi ha ka bynta kaba khatduh eh. U ong ba ka jingthmu hi ka long ban pynlong ia kane ka State University kaba treikam noh hapoh u 2024.
Hynrei, namar ka jingwan jong ka elekshon Lok Sabha, lada ym lah ban thungkam ia baroh ki nonghikai kane ka State University kan hap dang treikam noh naduh u 2025.
Nalor kane, u Myntri ula pyntip ba ka pisa ba T. 16.96 klur la dep ban pynlut haduh mynta halor ka jingpyntrei ia ki jingtei jong kane ka University.
Ula iathuh ba ka jingtei iaka Administrative Block bad Academic Block nalor ka jingtei ia ki Hostel ki Shynrang bad Kynthei kila dep mynta.
Haduh mynta, 56 tylli ki kam la deo ban mang ba kynthup ia u Vice Chancellor bad Registrar. U pyntip ba ka Sorkar kala dep mang ruh ban shna ia ka surok shapoh ka University lem bad ka jingpynpoi ia ka umbam umdih.
“Ngi la dep thung iaka Bora dog Governors. Ka jingialang ba nyngkong jong ka Board of Governors kala long ha ka 14 tarik Kyllalyngkot 2022 bala pyniaid da u Myntri ka Tnad Pule Puthi” ula bynrap.
