Shillong, Iaiong 22: Kawei ka iing kaba don ha ka shnong Morongga Nengkram, East Garo Hills kala pluh kynsan hynne ka sngi Baar bad kane ka jingpluh kala jia namar ka jingbym biang ia ka rukom pyniaid ia ki waiar bording bad kam dei kaba leh dusmon da kino kino ki briew.
U Superintendent of Police jong ka East Garo Hills Bah Stephen Rynjah, ula pyntip ba hynne ka sngi Baar, ha ka por 12 baje mynsngi, ka Mangsang Outpost kala ioh ia ki jingtip ba kala don ka jingpluh kawei ka iing jong ka Presila N. Marak ka ba na ka shnong Morongga Nengkram, kaba hap ha ka jingkhmih jong ka Rongjeng Police Station bad kumta ka Fire and Emergency Service Station, Rongjeng kala leit mardor sha katei ka jaka ban pynlip ia kane ka ding.
U Bah Stephen ula ong, ba ki pulit kila lap ba kam shym la don kano kano ka jingleh sniew da kino kino ki briew bad ym shim la don briew ruh hapoh katei ka iing ha ka por ba jia ka jingkem ding.
Ula ong, ba la shem ba katei ka jingpluh ka dei namar ka jingdon ka jingthud ha ka bording elektrik namar ka jingbym biang ka rukom pyniaid ia ki waiar bad kam shym la don satia kano kano ka jingleh sniew.
U SP ula maham ruh, ba lada tip ne lap ia kino kino kiba shimkabu ia katei ka jingjia da ka jingthmu ban pynthud ia ka shongsuk shongsain bad ban wanrah ia ka jingsngewpher jaidbynriew, ki Pulit kin leh da kaba tyngeh pyrshah ia ki katkum ka ain.
