Shillong, Rymphang 09 : U Justice BP Katakey, uba khlieh ia ka Committee ba thung ka Iingkashari Meghalaya High Court, ula pynpaw ia ka jingsngewkhia kaba khraw halor ka jingbthei ba dangshen ka par dewiong ha East Jaintia Hills, haba maham ba ka jingpynbthei dynamite ha ki par ba tih dewiong beain, ka lah ban lam sha ki jingiap briew shuh shuh, kaba la shim ia ka mynsiem jong 27 ngut ia mynta.
“Ka long kaba ima shikatdei eh ba kila sdang ban pyndonkam sa u dymanite na ka bynta ban tih dewiong beain. Kham hashuwa, kaei kaba ki ju leh ka long ba ki phah ia ki briew shapoh, tih bad sei ia u dewiong shabar hynrei mynta kila sdang pyndonkam dynamite khnang ba kin ioh tih kham bun u dewiong hapoh ka por kaba lyngkot” ong u Justice Katakey.
“Haba peit ia ki kam beain kiba nga iohi ha lynti ba nga leit sha katei ka jaka bad ruh ia ka buit thymmai ba kila shim ban pyndonkam da u dynamite, nga sheptieng ba kum kine ki jingjia ki lah ban jia biang shen” ula maham.
Ula ban jur ba ki bor district badki pulit ki don ia ka jingkitkhlieh ban iada ia ka jingim jong ki nongbylla ba lui lui bad ki dei ban leh tyngeh pyrshah ia ki trai par.
“Nga la bthah ia u Deputy Commissioner bad ia u Superintendent of Police ba ka jingbym leh eiei jong ki, 27 tylli ki metiap lah ioh ban tam. Phi hap shim ia ka jingkitkhlieh ban iada ia ka jingim jong ki briew ba lui lui. Kine ki dei ki nongbylla ba lui lui, phi lah ban leh tyngeh pyrshah ia ki trai par dewiong” ong u Justice Katakey haba bynrap “Ka bha eh ba kila sdang ban leh eiei bad namar kane, kila ioh kurup ia bun bah ki detonator hapoh ka Umpleng Police Station na ka jaka ba ki khot ka Cement Bazaar bad ruh na ka shnong Mynsngat kila ioh kurup ia katto katne ki detonator kiba thmu ban pyndonkam ha ka jingtih dewiong”.
U Justice Katakey ula hiar sha ka par dewiong ba bthei ha Mynsngat-Thangsko myn ha ka 6 tarik Rymphang bad iohi dala ki jongki khmat ia ka jingbun ki krem tih dewiong beain.
“Nga poi ha ka jaka ba jia ha ka por 1 baje janmiet jong ka 6 tarik Rymphang bad kyndit ban iohi ia ka kam tih dewiong beain kat shaba phai, ym tang ha kane ka jaka ba bthei, hynrei ha baroh arliang jong ka surok ba poi sha katei ka jaka” ong u Katakey.
“Nga la kylli jingkylli ia ki nongbylla kiba la iathuh ba kila tih dewiong na kane ka thain mynta la 16-20 snem” ula ong haba pynpaw ia ka jinglyngngoh ba kine ki kam beain kila jia tang 10km ka jingjngai na Khliehriat bad ba ym don ba iohi mano mano ruh.
“Baroh baroh ki lah ban iohi ia kine ki kam- lait noh ki bor District” kynthoh u Chairman ka Committee.
Kat kum ka jingpyntip ki bor Sorkar, haduh 27 tylli ki metiap la lap haduh mynta, hynrei ki bahaiing jong ki briew ba dang jah ki sheptieng ba ka jingdon kiba iap ka lah ban nang kiew.
“Kila ong ba ki dang don bun ban ia ka met bala lap, kiba la leit shapoh kane ka par dewiong ba beain” bynrap u Justice Katakey.
Ula bthah shuh shuh ia ki bor district kynthup ia u DC bad SP ba kin kurup ia ki tiar bad ban leh eiei, haba ban jur ba dei ban tyngrong ia ka jingkitkhlieh bad ba dei ban kem ia ki trai par.
U Justice Katakey ula pdiang sngewbha ia ka jingbthah jong ka Iingkashari ia u DC bad SP ka East Jaintia Hills ba kin wan mih dalade hapoh ka Iingkashari, haba pynpaw ba ka dei ka sienjam ha ka lynti kaba dei.
“Ka long kaba dei eh ba ka High Court kala bthah ba kin wan mih dalade” ong u Katakey haba bynrap “Dei ban ong ha ki ba kaei kaba jia ka dei ka bym lah ban pdiang, bad yn ym sngap jar jar ia kino kino ki kam beain nangne shakhmat”.
