Shillong, Jymmang 16 : Ka District Magistrate ka East Khasi Hills, kala maham tyngeh ban pynshitom ia kino kino ki briew, ki Iing, ki dukan bad ki karkhana kiba pyntuid bad bret jakhlia shapoh ka Wah Umkhrah bad Umshhyrpi.
Ka District Magistrate kala pynjari da ka kyndon 163 BNSS bad maham ba kino kino kiba pynkhein ia ka hukum, kin shah pynshitom hapoh ka kyndon 223 jong ka BNS bad ka jingtian bishar hapoh ka kyndon jong ka Water ( Prevention and Control of Pollution),Act, 1974 bad ka Air ( Prevention and Control of Pollution)Act, 1981.
Kat kum ka hukum, ka District Magistrate kala pyntip ba ka Ophis kala iohpdiang ia ka jingpyntip ba kat kum ka kaiphod jingleh test jong ka Meghalaya State Pollution Control Board (MSPCB) ia ka um ha Wahumkhrah bad Umshyrpi, la shem ba kam shym la don satia kano kano ka dak ba kan khuid ha ka um khamtam ha ka thain Umshyrpi marjan ka Law College, Umshyrpi ha Jingkieng Umshyrpi, Umkhrah ha Demthring, Umkhrah ha Urkaliar, Umkhrah ha jaka otdoh ha Mawlai Phudmuri bad Umkhrah ha Mawlai Mawpdang.
Kala kdew ruh ba kala nang jur ka jingpyntuid jakhlia ki longiing na ki septic tank sha kine ki wah bad ka jingbret ia ki jaboh ha ki surok bad kine ki wah, kaba lam sha ka jingpynjaboh bad pynlong ia kine ki wah ba kin ym long shuh ban pyndonkam bad buh jingma ruh ia ki dohum dohpnat.
Kala ong ba kine ki kam pynjaboh ym tang ba ka pynjaboh ia ka lyer bad ka Wah hynrei ka buh ruh ia ka jingma ia ka koit ka khiah jong ki nongshongshnong jong ka District.
Ia kane ka hukum la pynmih naduh ka 13 tarik Jymmang bad kala treikam mardor.
