Nongpoh, Nailar 31: Ka seng Khasi Student Union, North Khasi Hills District mynta ka sngi kala maham ia ki Karbi Student Association (KSA) bad ki jaitbynriew Karbi jong ka West Karbi Anglong ba kim dei ban mushlia ïaki shnong Khasi haka jingiakren pynbeit pud jong ka wat kaba ar haba ong ruh ba kim dei ban pynthud ïaki Khasi ba shong ba sah haka thaiñ Block II kumba leh ki Khasi ia ki Karbi kiba sah ha Them Ri-Bhoi.
“Ka seng KSU ka kren da kaba shai kdar sha ka Karbi Students Association bad ki jaidbynriew Karbi ba kim dei ban mushlia ne kynshoit ban pynthut ia ki Khasi ba sah ha Block –II” ong u President ka KSU-North Khasi Hills samla Ferdinald Kharkamni.
“Ki Karbi ruh ki don bun bah ha Meghalaya bad ki dang shongsuk shongshngain haduh mynta bad ki don ka jingiadei ba iajan bad ki Khasi khamtam ha Them Ri-Bhoi. Ngi kwah ruh ba ki Khasi ha Block-II kin shongsuk kumba long ki Karbi ha Meghalaya” ula bynrap.
Une u Nongialam ka KSU ula ong ba ka Sorkar Meghalaya bad ka Sorkar Assam kin sa sdang noh shen ban iakren biang ha ka wat kaba ar ban iapynbeit ia u pud u sam jong ki hynriew tylli ki jaka ba dang sah kynthup ka Block-II.
“Ngim kwah bad ngim sngewtynnad lada ka KSA ne ki Karbi kin muslia ne tuklar ia kane. Ngim kwah ba kin mushlia ia ki shnong ki thaw ba sah da ki Khasi kaba la sdang mynta khamtam ha ki Shnong Khasi kiba la pynhap sha ka West Karbi Anglong kaba dang shu mih thymmai ha u snem 2015” ula ong.
U samla Ferdinald ula ong ba kan long kaba bakla shibun lada ki Karbi ki sdang ban pynmeh ia ka ding.
“Haduh mynta, ngi hangne ha Meghalaya ngi ia im bad ki Karbi kum shipara bad ngi kum ka KSU ruh ngim ju tuklar ia ki shnong bas ah ki Karbi. Hynrei lada ki sdang pynmeh ia ka dong, ka KSU kan aiding syndon da kaba heh bad ka ban klang bad pur sha ki Karbi ba sah ha Meghalaya” ula ong.
