Shillong Risaw 10: Ka Shillong Traffic Police ha kine ki 48 kynta kiba la dep, kala pynlong ia ka jingkhynra ha kylleng ki jaka bad kala lap ia 7 tylli ki thuk thuk kiba la pynkylla ne ‘modify’ ia ki exhaust pipe (silencer)kiba pynmih iaka jingsawa kaba jam.
Katkum ka kyrwoh na u Superintendent of Police (City) Bah Vivek Syiem, la ong, namar ka jingpynmih ia ka jingsawa kaba palat jong ki thuk thuk kiba la pynwandur hi ia ki Exhaust Pipe, kaba pynthud pat ia kiwei, ka Shillong Traffic Police kala pynlong ia ka jingkhynra ha kylleng ki jaka bad kala lap ia ki 7 tylli ki thuk thuk ha kine ki 48 kynta.
U pyntip ba ia kine ki thuk thuk la hukum ba kin phah bujli noh ia kitei ki Exhaust Pipe kibala pyndait ha ki thuk thuk ha ryngkat bad ka daiñ kuna ia ki.
“Ka Shillong Traffic Police ka kyntu ia baroh ki trai kali, kiba pynkylla hi ne phah ‘Modify’ ia ki Exhaust Pipe ba ki dei ban weng noh mardor bad ban buh beit da ki tiar kiba la pyndait nyngkong” ong u Bah Vivek.
Ula pyntip ba kane ka jingkhynra ia kiba pyndait ia ki Exhaust Pipe kiba la ‘modify’ kynthup lang ia ka jingpynkhein ruh iaka Motor Vehicles ACT kali, kan dang iai bteng bad yn leh da kaba tyngeh pyrshah ia kiba pynkheiñ ia ka aiñ.
