Shillong, Risaw 12: U Sordar ka Raid Nongskhen u bah Sukher Nongrum ula maham tyngeh iaki kynthei Khasi kiba wan ialam lok mynder kiba napoh ka Ri Bangladesh.
“Kino kino ki kynthei lane ki longkmie kiba ioh lok bar jylla khamtam ki mynder Bangladesh bad kiba leit sah sha Bangladesh lane kiba wan ialam iaki lok na Bangladesh, kim dei satia ban wan sha ki 7 tylli ki shnong jong ka Raid Nongskhen” la maham u Sordar haba iakren bad ki nongthoh khubor.
U bah Sukher ula ong ba lada ka shnong ka lap ia ki ba leh pyrshah, ka bor shnong kan shim iaki sienjam ba tyngeh katkum ki kyndon jong ka ain shnong.
Haba kylli kum kiei kita ki sienjam ba ki bor shnong ki shim pyrshah iaki kynthei ba ioh lok nong Bangladesh, u Sordar ula ong “Ki kyndon ki don la ki kyndon bad haka jingshong bishar u Khasi, ki don la ki jong ki jingpynshitom kata ban maham, ban dain kuna bad kiwei kiwei”.
U bah Sukher ula ong ruh ba ki kynthei kidei ban tip ba u nong Bangladesh um lah ban rung beain hapoh Meghalaya India khlem ki kot ki sla ba biang bad ka jingshong lok iaki ka la long lypa kaba beain.
