Nongpoh, Naitung 10 : Ka Dorbar Shnong Pyllun, Umiam bad ka seng HITO, kila maham tyngeh bad khang pyrshah ia kino kino ki briew kiba wan iengkai ne leh sngewbha halor ka jingkieng fly over kaba don ha Umiam namar ka jingsngewkhia ia ka jingnang kiew ki kam awria bad kam sniew hapoh ka lad Umroi.
Kane ka jingmaham kala mih hadien ka jingiapynkhuid shnong ia katei ka jingkieng fly over hynne ka sngi Nyngkong, kaba la dap da ki jaboh jabain, ki bitor kyiad bad kiwei kiwei. Ia kane ka jingpynkhuid shnong la pynlong da ka Dorbar Shnong Pyllun ha ryngkat ka HITO-Umiam Circle, ka Seng Longkmie lem bad ki Pulit ka Umiam Police Station.
Ka Dorbar Shnong kala buh syndon da ka jingthoh halor kane ka jingkieng ba mana pyrshah ban leh kam awria ne ban iadih kyaid ne ban iengkai da ki kali halor jong kane ka jingkieng, kaba ju jia bha haka por mynmiet.
U President ka HITO Bah G Lyndem ula ong ba kane ka jingmana kan treikam naduh ka por 6 baje janmiet shajrong.
Kat kum ka jingong jong u, ka Seng lem bad ka Dorbar Shnong, ka seng Longkmie bad ki Pulit kila shimkhia ia kane ka kam namar ba ki kam pyntriem bad ki kam iashoh iadait kala jia na kawei ka sngi sha kawei pat halor kane ka jingkieng ha kaba uwei u samla ula duh noh iala ka jingim na ka jingshah shoh ha ki briew ki bym lah satia ban ithuh, kaba la jia hajan katei ka jingkieng.
Ula ong ba lada lap ia kino kino kiba ialeh pyrshah ia kane ka jingmaham, ka HITO bad ka Dorbar Shnong kin sa pynngat ha ki jingpynshitom kiba tyngeh.
Pule lang ia kane:Â Tripura: Kem ki Pulit ia 3 ngut ki kynthei Rohingya bad 2 ngut ki Khynnah
