Shillong, Naitung 18 : Ka Rangdajied United FC ka la ioh ban pynliem da 2-0 kol ia ka Shillong Lajong FC ha ka lympung ialehkai jong ka Shillong Premier League kaba long ha ka janmiet sngi Nyngkong ha madan Third Ground Polo.
Ia ki kol jong ka Rangdajied United ha kane ka sngi la ioh ban thep da u Wanlamsuk Nongkhlaw ha ka minit kaba 61 katba ia ka kol kaba ar pat la ioh ban thep da u Knerkti Buam ha ka minit ba 90+4 ha shwa ban kut artad ka por ialehkai.
Haba phai sha ka jingialehkai ha katei ka sngi, baroh arliang mamla kim shym la ioh lad satia ban thep kol ha ka kylla step hynrei dei ynda la poi ka kylla miet ba ka Rangdajied United ka la ioh ban thep haduh ar kol bad khur suk ia ki lai point.
Ka Rangdajied mynta ka don ha ka kyrdan ba ar da ki 11 point katba ka Shillong Lajong pat ha ka kyrdan ba 6 da ki 4 point.
Ka jingiakhun lashai ka sngi pat kan long hapdeng ka Malki SC pyrshah Nangkiew Irat SC ha ka por 4baje janmiet.
