Shillong, Naitung 18: Ki Pulit ka West Garo Hills kila ioh ban kurup biang ia palat 70 tylli ki thuk thuk ba shah tuh bad iohkem haduh 30 ngut ki briew kiba donkti ban tuh bad ba thied ia kine ki kali arshaka ha kine ki artaiew bala leit noh.
“Ka jingkhynra jong ngi ba khlem sangeh kala pynlong ia ki briew kiba thied khlem ka jingtip ia ki thuk thuk second hand ba kin wan shakhmat ban pynthikna ia kine ki kali arshaka ba ki thied. Da kane, ngi la ioh ban kurup ia palat 70 tylli ki thuk thuk “ iathuh u SP kaWest Garo Hills u Vivekanand Singh Rathore.
Une u Heh Pulit u iathuh ba ki Pulit ka District kila ioh ban kem haduh 30 ngut ki briew bad kine ki kynthup ia ki nongtuh kali, ki nongdie bad ki nongthied.
Kane ka jingkhynra kala long kaba jop ha kaba la lah ruh ban lapksai ia ki jingjia tuh kali kiba rim kiba la jia ha ka jylla Assam bad Meghalaya.
“Ki 20 tylli ki jingjia ki bym shim la lah ban lap ksai ha kine ki 2 tylli ki jylla bad ia kine la lah ban lapksai mynta lyngba katei ka jingkhynra” ong u Rathore.
Kiba bun ki thuk thuk kiba la shah tuh la lap noh iaki na ka shnong Dadenggre, Phulbari, Jengjal bad Tura.
