Shillong, Lber 31 : Ka jingther u slap hynne ka sngi thohdieng, kala wanrah ia ka jinglang um ha ki katto katne ki jaka ka Nongbah Shillong kaba la ktah ia ka leit ka wan u paidbah bad ka daw tynrai jong kane baroh, ka dei tang namar ka jingbym biang ki nala ban tuid ka um.
Ka surok ha ka thain Polo ka dei kaba la shah ktah jur ha kaba jan shilynter na ka surok kala shah tap ha ka um nala kaba la lang bad buh hapdeng ka jingeh ia ki kali bad ki paidbah ha ka jingeh ba kin iaid kin ieng.
Ka jingbym don ia ki nala kiba biang ha ka thain Polo ka dei kaba la sngewkhia da baroh bad ka jingther u slap dang shen kala nang kynton ia kane ka jingeh. Kane ka jinglang ka um kala wanrah ia ka jingdheng kali bad pynbitar ia kiba bun ki nongleit nongwan.
Ki Nongshongshnong ka thain kila ju ujor pyrshah ia ka jingbym shymkhia jong ki bor khmih ban shna pynbha ia ki nala. Kila ong ba wat hapdeng ki jingujor ba man ka por, ka Tnad ba dei khmih haduh mynta kam pat leh eiei satia. Kila dawa ia ka Sorkar ban leh eiei noh ha kaban shna pynheh bad pynbha ia ki nala bad ban pynthikna ba kum kine ki jinglang um ha surok kin ym jia shuh hadien habud.
Pule lang ia kane: Gherao ki paidbah ka BDO ka Resubelpara ba pynduna ia ka sngi bylla jong ka MGNREGS
