Nongstoiñ, Nohprah 12: Ka Seng Federation of Khasi Jaiñtia & Garo People (FKJGP) Kyrshai Area Unit, ka dawa na ka sorkar MDA lyngba ka tnad ka koit ka khiah, ban kyntiew kyrdan noh ïa ka Kyrshai Sub-Health Centre sha ka Public Health Centre (PHC).
Kane ka Sub-Health Centre Kharshai ka don ha syndah khappud jong ka Meghalaya bad ka Assam bad ka dei ruh kaba ai ka jingshakri ïa ki 16 tylli ki shnong ha khappud bad ka Assam kaba kynthup ïa ka Kyrshai, Mawpun, Nongspung, Ukiam, Borkhuli, Doledonga, Warigro, Hasem, Umthli, Umdiengsyier, Umdiengphiang, Talimara, Mawdiangkop, Dariphang, Umbah, Umkhamdor bad Patharphlang.
Kane ka Sub-Health Centre kaba hap hapoh ka jingpeit jong ka PHC Rambrai hynrei namar ka jingbym don surok, ki paidbah jong kitei ki shnong kila leit ban shim dawai shaduh Rambrai bad hap iaid kjat kaba shimpor haduh 7 bad 8 kynta.
Ka FKJGP ka pyntip ba ki paidbah katei ka thaiñ ki im ha ka sangsot, khamtam katei ka thaiñ kaba jur bha ki jingpang khieshohrih. Ka ong ba ki longkmie bad khunlung ba donkam bha ka jingsumar, kim ïoh satia ia ka lad jingïarap na ka tnad ka koit ka khiah.
Ka seng ka pyntip ba ka Hospital kaba jan duh ka dei tang jong ka Sorkar Assam hapoh Boko Hospital kaba hap hapoh Assam, kaba jngai na Kyrshai kumba 50 kilometer bad dei namar kane ka daw, kiba bun ki mynsiem ki duh ei ïala ka jingim tang na ka jingbym biang ki jaka sumar jong ka Sorkar.
Ka Seng ka kyrpad ïa ka Sorkar ban kyntiew kyrdan noh ïa ka Sub-Health Centre (PHC), khnang ba ki paidbah jong kine ki thaiñ kin ïoh lem ka koit ka khiah kumba ïoh ki para nong Meghalaya.
“Ngi ïohi ba bun ki PHC hapoh ka Jylla jong ngi ki jngai tang kumba 10 kilomter lane 15 kilometer kawei na kawei ka PHC sha kawei pat. Ia mynta shi por kat bym pat kyntiew kyrdan ïa ka PHC, la dei ban mang kyrpang ïa ki dawai dashin kham bun ïa katei ka Sub-Centre”, ong u Bah Francis Sohshang President ka FKJGP-Kyrshai.
