Shillong, Naiwieng 20 : U Nongialam ka UDP bad Myntri Sorkar bah Kyrmen Shylla ha ka sngi Balang ula ong ba ka shong ha ki paidbah ka East Jaintia Hills District ban rai la ka jingwanrah lynti rel kan pynmyntoi ne em ia ki.
Haba kren sha ki nongthoh khubor, u bah Kyrmen ula ong ba namar ka jingkhim ka por, ym shym la lah satia ban pynlong ia ka jingialang paidbah kaba thmu na ka bynta shim ia ki jingai jingmut jong ki kynhun bapher bapher halor ka jingtyrwa wanrah lynti rel.
“Ia kane ka jingialang ym shym la lah ban pynlong tang da ka jingkwah jong nga hynrei ka dei ban long ka jingkwah u paidbah. Ia kane ngi hap ban sdang da ka jingiasyllok bad ki kynhun bapher bapher bad mynta kam pat dei ka porn aba bun kim pat ialait. Ynda la biang ka por, ngin sa khot ia ka jingialang na ka bynta kane” ula ong.
Haba kylli, u Myntri ula ong ba ym don jingartatien satia ba ka roi ka par ka wan ha ryngkat ka jingmyntoi bad jingktah.
“Hynrei ngi hap ban peit ia kaei kaba kham iohnong la ka long da kaba wanrah ia ka lane ban nym wanrah ia ka. Lada ka dei kaba iohnong bad ka aikam aijam ia ki briew-kane ka shong ha ki paidbah ban rai. Kam pher lada ka iohnong katno katno ruh lada ki paidbah kim pdiang, ngim dei ban pyniaid shakhmat hynrei lada ki paidbah ki ong ba ngi dei ban wanrah bad lada ka ai jingmyntoi, ka don jingmut ban iapynlut ia ka por bad leh eiei” ula ong.
