Shillong Nailar 25: U Myntri Kam Pohiing ka jylla u Bah Lahkmen Rymbui u la ong, ka jingsaphriang jongka kaiphod jingtohkit ba kala don ka jingpyndonkam bakla iaka bor da u Assistant Inspector-General of Police (Administration) Bah Gabriel K Iangrai kam pat dei kaba pura ne kaba thikna namar haduh mynta ka sorkar jylla ne wat u Director General of Police (DGP) kim pat ioh pdiang satia ia ka kaiphod jingtohkit.
“Ia mynta ngam pat lah ban ong eiei, nga dang ap ban ioh iaka kaiphod kaba pura bad ngin sa leh ia kaba donkam. Lada don mano mano ba donkti bad ka don kano kano ka jingpyndonkam bakla, ka aiñ kan sa leh ia kaba donkam” ong u Bah Lahkmen Rymbui.
“Ka Tnad Kam Pohiing kala phah iaka jingthoh sha u DGP ba kumno ka kaiphod tang ha u ruh kam pat poi, kala poi pynban sha ki kot khubor bad ka lah ban don kaei re kaei” ula bynrap.
Kat kum ka jingong u Myntri, ka Tnad Pulit kala thung ia ka Fact Finding Team ban lap iaka jingshisha bad lada lap ba ka don ka jingleh bakla, ki briew kiba donkti kin shah pynshitom katkum ki kyndon aiñ.
“Ngin hap ban leh da kaba tyngeh ruh lada ngi lap ia kiba la pyllait ia katei ka kaiphod khamtam ba kam pat dei ka kaiphod kaba pura bad kumno ki kot ki sla kiba kongsan tam na ka Police Headquarter kin lait shabar haba wat tang u DGP ruh ym pat ioh” ong u Myntri.
U Myntri ula ong “Ka jinglait shabar jong ka kaiphod ka long kaba ma bha, namar ioh don kino kino ki kam kiba iadei bad ka jingshongshngain jong ka jylla ki lait shabar” bad bynrap “Donkam ban shimkhia bha ia kane ym tang namar ba ka lait katei ka kaiphod hynrei ioh ki lait sa kiwei pat ki jingthoh kiba kongsan”.
Halor ka jingkynnoh ba ki don ki heh pulit ki pyndonkam bakla iala ka bor, da kaba phah ia ki pulit langrut ban shna iaka iing jongki ne wat ban trei iaki kam iing, u Bah Rymbui u la ong, “Halor kane ngam pat ioh jingtip eiei ba ki don kiba pyndonkam bakla iaka bor, ngan ap shwa ban ioh pdiang iaka kaiphod jingtohkit bad ngin sa ia peit hadien”.
