Aizawl, Naiwieng 11 :Ia kiba bun ki jait mrad ba kham pher na Southeast Asia la khaii beain lyngba ka Champhai district ha khappud ka Mizoram bad ka Myanmar, ong ki heh ka tnat Wildlife Crime Control Bureau, ministry of environment, forests and climate change ha ka sngi Balang ba la lah.
Kine ki heh sorkar hapoh ka jingialam jong u joint director u Manoj Kumar kila pynlong ia ka jingialang hapdeng ki tnat pahara hapoh ka ophis jong u divisional forest officer kaChamphai district ban iamir jingmut halor ki kam khaii beain ia ki mrad khlaw kiba kham pher.
Ha kane ka jingialang la pynpaw ruh ba kala don ka jingioh kurup ia kine ki jait mrad ba kham phet haduh hynniew sien ha ki bynta jong ka Champhai district naduh u bnai Kyllalyngkot jong ka snem ba la dep haduh u bnai Risaw mynta u snem, ha kaba la ioh ban kurup noh haduh kumba 723 tylli ia kiba kum kine ki jait mrad bapher bapher.
U Kumar ula ong ba ka jingkhaii beain ia kine ki jait mrad kala jur bha lyngba ka thain shatei lammihngi (Northeast) bad na West Bengal naduh kine ki ar snem ba la dep, ha kaba ka Champhai district kala kylla long ka jaka rung jaka mih ba kongsan ha kine ki kam khaii beain.
“Ka Wildlife Protection Act 1972, ka thmu na ka bynta ban iada ia ki mrad khlaw jong ka ri, kaba donkam ruh ia ka jingpynkylla, kata ban kynthup halor ka jingiada ia ki mrad khlaw ha kiwei pat ki ri da kaba kynthup ruh ia ki kam khaii beain ia ki mrad na kiwei pat ki ri, ong u Kumar.
Shuh shuh ula ong ba ka jingshim ia ki sienjam ban pynthikna halor ka jingai jingmynjur ia kane ka jingpynkylla ia ka bill hapoh parliament ka ban kynthup halor ka jingiada ia ki mrad khlaw ba la khaii beain na India sha kiwei pat ki ri.
