Jowai, K’lyngkot 22 : Ki paid riewngeit Hindu na kylleng ka ri-lum Jaintia kila ialum paidbah hynne ka sngi Nyngkong ha Shiv Mandir Complex, Jowai ban iashimbynta ha ka Pran Pratishtha Patrika bad ban sakhi ia ka jingplie paidbah ia ka Ram Mandir ha Ayodhya, Uttar Pradesh.
Ia kane ka jingialang ha Complex la pynlong da ka Vishva Hindu Parishad (VHP) Jowai. Ia kane ka complex ka pynkup ia ka dur ka dar ba itynnad bad la pyndait ruh ia ka TV ban pyni ia ka jingialang ba long ha Ayodhya.
Ki riewngeit la iohi ba kila pyndem ha ki jingduwai bad kala don ruh ka jingsam ia ki Prasad bad jingbam sha ki riewngeit bad ki nongshah khot sngewbha.
U Bholak Kumar Gupta, Secretary ka VHP – Jowai ula ong ba mynta ka sngi ka dei ka sngi sah kynmaw namar la lah ban plie pat ia ka Ram Mandir ha Ayodhya hadien 500 snem.
Ula pyntip ba mynta ka sngi baroh ki paid riewlum bad ki bar jylla kila iadonlang hapoh ka complex ban sakhi ia kane ka jingialang plie mandir ha Ayodhya.
U Gupta ula ai khublei ia ka Dorbar Iawmusiang kaba la ai jingbit ba lehkmen ia kane ka sngi. Ula ai khublei ruh ia ki bor khmih ka Seinraij Jowai bad ki bor District halor ki jingkyrshan ba ki ai.
