Shillong, Jymmang 04: Ka Meghalaya Football Association (MFA) kala lum ia ka jingialang ha ka sngi Saitjain bad ki nongmihkhmat kiba na kylleng ki District jong ka jylla kiba la pyniasoh bad ka MFA.
Ki rai kiba kongsan kiba la shim ha kane ka jingialang ka long ban pynkhlain ia ka rukom pyniaid ia ka jingialehkai Football hapoh ka jylla Meghalaya.
Ha kane ka jingialang la wan ban iashimbynta da u President ka MFA u Bah Hamletson Dohling, u General Secretary Bah Sunesh Syiem bad kiwei kiwei ki nongkitkam bad ki dkhot jongki Association na kylleng ki District.
Ka jingialang kala shim ia ka rai ban pyrkhing ia ka jingpynlong ia ki jingiakob ialehkai Football da ki kynhun shimet, ki Sports Club bad kiwei kiwei da kaba bud ryntih ia ki jingbthah jong ka All India Football Federation, ba kino kino kiba pynlong ia ki Football Tournament kidei ban pan bad ban ioh jingbit na ki District Sports Association kiba la pyniasoh bad ka MFA.
Kane kan treikam eh tang na ka bynta kito ki Tournament ne jingiakob kiba iashimbynta lang ki nongialehkai kiba tbit ne ki Professional Football Players kiba la rejistar ha ka AIFF Centralised Registration System (CRS) bad ki Referee kiba la ioh ia kyrdan jingithuh.
Ka jingshim ia katei ka rai, ka long ba ka MFA kan iengskhem ha kaban pynthikna ba ka jingpynlong ia ki jingiakob ialehkai Football ha kylleng ki bynta jongka jylla kadei ban pynlong ha ka lynti kaba ryntih bad kaba la ioh jingbit bad ia kane ka rai la kyrshan da ki District Association kiba la pyniasoh bad ka MFA ha ka jingialang jong ka Annual General Meeting.
Ha kane ka jingialang, ka MFA kala pyllait ruh ia ka kaiphod treikam ha kaba iadei bad ka jingpynlut pynsep bad kumjuh ruh ia ki kam kiba la leh ha kine ki shisnem kiba la dep bad ka jingpynkhreh ruh ban pynlong iaki lympung iakob ialehkai Football.
Ka MFA ka iengskhem ruh ha kaban aiti na ka bynta ban kyntiew ia ka jingialehkai Football ha ka jylla Meghalaya lyngba ka rukom pyniaid kaba khuid ba suba bad da kaba iatreilang bad baroh kiba donbynta lang.
 kala lum ia ka jingialang ha ka sngi Saitjain bad ki nongmihkhmat kiba na kylleng ki District jong ka jylla kiba la pyniasoh bad ka MFA.){kind=link}