Nongpoh, Nailar 07: Ka Synjuk Ki Rangbah Shnong Ri Bhoi District hynne ka sngi Nyngkong, ka la lum ia ki nongjalam ki Village Employment Council (VEC) ka Jirang bad Umling Block ban iatai halor ka jingpynkhreh ban ujor daka mukotduma sha ka Iingkashari halor ka jingbym pynlait pisa ka Sorkar Jylla ia ka bai tiar jong ka skhim MGNREGA.
Ia kane ka jingialang la pynlong ha Iingdorbar Shnong Iewmawlong kaba la wan iashimbynta da u President ka Synjuk Bah BB Makdoh, u Secretary Bah PB Sylliang bad kiwei kiwei.
Kine ki Nongialam ka Synjuk ki pyntip ba shen kin sa khot ruh ia ka jingialang jong ka VEC ka Umsning bad Bhoirymbong ban iamir jingmut halor ka jingpynkhreh ia kane ka jingai mukotduma pyrshah ia ka Sorkar.
Ha kane ka jingialang, ki nongkren kila pynpaw ia ka jingsngewkhia halor ka jingbym pyllait ka Sorkar ia ka pisa bai tiar jong ka skhim MGNREGS. Kila pyntip ba ka Sorkar kala pyllait tang ia ka pisa jong ki Nongtrei job card hynrei ym ia ka bai nong jong ki skill bad semi skill labour.
Ka SKRS kala iatai ruh halor ka jingdawa ban pyntreikam biang ia ki Area Employment Council namar bun ki AEC kim treikam shuh.
Ka Synjuk ka la pynpaw ruh ia ki jingeh jong ki VEC halor ka jing donkam ban phah ia ki attendance jong ki nongtrei job card sha ki Block Office namar don ki shnong ki bym biang ka network mobile bad la dawa ban phah ia ki attendance lyngba ka offline mode.
Pule ruh: Kem ki Pulit ia u briew ba kamai spah da kaba shukor aikam ia ki samla
