Shillong, Lber 14: Ka Myntri ka tnat ka koit ka khiah Dr. Ampareen Lyngdoh hynne ka sngi kala lum ka jingialang jong ki heh ophisar ka tnat naka bynta ban iaphylliew jingmut kumno ban nang kyntiew shuh shuh iaki lad jingsumar hapoh ka jylla.
Ha kane ka jingialang, ki ophisar ka tnat ka koit ka khiah kila pyntip shaka Myntri haba iadei bad ki jingpyntrei iaki skhim bad iaki Program lad jingsumar naka bynta ki paidbah nong shong shnong ka jylla.
Ki ophisar kila pyntip ruh haba iadei bad ka jinglah jong ka tnat ban pyntrei bha iaka jingsam jingiarap hapoh ka thup outpatient departments (OPD) lyngba ka skhim Megha Health Insurance Scheme, ka jingsdang iaka Meghalayan Medical Drugs and Services, ka Meghalaya Medical Services Recruitment Board, ka Rescue Mission bad kumno ban pyndonkam daki Technology ban kyntiew iaka koit ka khiah.
Naka liang u Principal Secretary ka tnat ka koit ka khiah u Sampath Kumar ula iathuh ba ka sorkar ka bud ryntih lyngba 3-Dimensional Framework naka bynta ban pyntrei iaka skhim ban ai jingiarap ban bei tyngka lyngba ka Meghalaya Health Policy 2021 naka bynta ki nongpang.
U Sampath Kumar ula iathuh ba ka tnat ka koit ka khiah kan iaid katkum ki lai tylli ki mat ban kyntiew iaki lad jingsumar kata ban wanrah ki lad ban iada naki jingpang, ban pynbiang iaki lad jingsumar bad ban kyntiew ne pynbha iaki jaka sumar kum ki CHCs, PHCs bad ki Sub Centres.
Lyngba kane ka sienjam ba ka tnat ka koit ka khiah ka shim, ka don jingkyrmen ban pynjlan iaka rta jong ki paidbah, ban pynbit pynbiang ki lad jingsumar iaki ba kham noh ka rta bad ban rat dkhong iaka jingkhlad ki khunlung bad longkmie bad kiwei kiwei de.
Naka liang ki ophisar ka tnat ka koit ka khiah kila pynpaw ruh shaka myntri haba iadei bad ka jingduna nongtrei khamtam ban pynbit pynbiang ki lad jingsumar sha ki thain kyndong bad ka jingkiew ki jait jingpang naka ka jingdih duma, kyiad bad kiwei kiwei.
Haba iadei bad kane ka myntri ka tnat ka koit ka khiah ka Dr. Ampareen Lyngdoh kala kyntu iaki ophisar ban nang trei shimtom naka bynta ban kyntiew iaki lad jingsumar hapoh ka jylla naka bynta ka jingmyntoi ki paidbah.
Ka Dr. Ampareen kala kyntu ruh iaki ophisar ban shim jingmut na baroh ki MLA kumno ban iaid shakhmat ban pynkhlain iaki lad jingsumar bad kumjuh ruh ban iatrei lang bad ki apidbah ha man ki shnong ban rat dkhong ia kino kino ki jait jingpang.
