Shillong, Lber 27 : Ka Khasi Hills Autonomous District Council (KHADC) kala ioh lum palat T. 26 lak ka khajna na ki 16 tylli ki khyrdop ba don ha u pud u sam jong ka hapdeng u snem 2024-25.
Ia kane la pyntip da u Executive Member (EM) ba khmih ia ka Tnad Tax Bah Winston Tony Lyngdoh haba jubab hapoh ka Iingdorbar hynne ka sngi Palei.
Na kine ki 16 tylli ki khyrdop, ki licence jong ki 7 tylli ki khyrdop kin sa kut noh ha ka 31 tarik Lber 2025 katba 9 tylli kila aplai ban pynthymmai.
“Hynrei, ka EC kan sa shong bishar ia ki aplikeshon jong ki hashuwa ba kan shim rai ia kane ka kam” kular u Bah Lyngdoh.
Kat kum ka jingong jong u, kine ki khyrdop kila lum T. 500 na kawei ka kali heh, T.300 na ki kali pdeng bad T.100 na ki kali rit.
Haba jubab ia kawei pat ka jingkylli, u Bah Lyngdoh u pyntip ba ki don 4 tyli ki check gate ka Council ia kaba artylli ki don ha Ri-Bhoi bad 2 tylli ha East Khasi Hills District.
Ka check gate ha Umiam ka dei kaba la pyniaid da u W Ryntathiang bad ha Lum Nongrim, Umling la pyniaid da u S Surong katba ka check gate ha Mawryngkneng-Mawkhanu la pyniaid da u Shemphang Kharsatia bad ha Majai da Sita Thangkhiew.
Ula pyntip ruh ba ka EC kam shym la don ia kano kano ka jingtip halor ki check gate beain kiba treikam hapoh u pud u sam ka Rambrai-Jyrngam constituency. Hynrei ula kular ba un sa pan kaiphod halor kane ka kam.
 kala ioh lum palat T. 26 lak ka khajna na ki 16 tylli ki khyrdop ba don ha u pud u sam jong ka hapdeng u snem 2024-25.){kind=link}