Shillong, Nailur 15 : U Myntri Rangbah ka Jylla Conrad K Sangma ha ka sngi Ba-ar ula ong ba ka jingpynshai jong ka Sorkar Pdeng ba ka Uniform Civil Code (UCC) kan long kat kum ka jinglong ki Jylla, kala pynkylla lut ia ka jinglong jingman jong ka jingiakren halor jong ka.
U Conrad ula pynkynmaw ia ki nongrim jong u ba ka ain ba long kumjuh ha baroh kawei ka Ri ka dei ka bym lah satia ban pdiang.
“Kum ka jingmut, ka jingpyntreikam ia ka UCC ha India ka dei kaei kaei ka bym don jingmut ha nga. Ka i kumba kan ym long satia bad ka dei kaei kaei kaba ngin ym lah ban pdiang” ula ong kham hashuwa.
U ong ba ka jinglong jingman kala pher mynta namar u Myntri kam Pohiing ka Ri ula pynpaw ba ka UCC kan long kat kum ka jinglong ki Jylla.
“Lada phi khmih ia ka UCC Meghalaya, kan dei ka UCC riewlum, bad ka system kan long khambun kum ka imlang sahlang ba ai pateng sha ki Kynthei. Nga la ong ba lada ki wanrah ia ka Bill ha Parliament kaba ong ba naduh mynta baroh kin long ki jingai pateng sha ka kynthei, ngin dei ki briew kiba kmen eh ban pdiang. Kumta khlem da iohi ia kaei kaba don ha kano kano ka Bill, kan long kaba bakla ban shu pynman ban shu rai” ong u Conrad.
U Conrad ula ong ba kano kano ka rai halor ka UCC ha Meghalaya yn sa shim tang hadien ka jingia syllok ha baroh kawei ka Jylla.
“Ngi hap ban shim ia ka jingmynjur lang u paidbah bad ngin sa iasyllok bad ki kynhun bapher bapher, ki seng sain pyrthei, la ngi kwah ne em ia ka bad lada ngi kwah, kum kaei ka ain ba ngin don” ula ong.
Ula bynrap ba kum ka Jylla ba bun ki riewlum bad ba khleh jaidbynriew, ka jingpyntreikam ia ka rukom ai pateng sha ki kynthei ia baroh ka lah ban buh jingeh ia ki jaidbynriew bar jylla bad kumta, ia kane ka kam donkam ban hap ban iatai bha.
“Kam don jingma ban iasyllok bad shim ia ka jingai jingmut na u paidbah. Kaei kaba ngi leh, kan long beit na ka bynta ka jingmyntoi uba bun balang” ula bynrap.
