Shillong, Nailur 16: U Myntri Rangbah ka jylla u Conrad K Sangma u la pynbna ba ka kynhun Myntri kala mynjur ban sdang pyntreikam ïa ka CM IMPACT+ – ka skhim Grant-in-Aid na ka bynta ki skul secondary bad higher secondary ha ka jylla.
U Conrad u la ong ba ka jylla ka don kumba 9 hajar tylli ki skul primary bad ka jingkhein ka hiar sha ka 1900 tylli haba poi sha ki secondary bad higher secondary hapoh ka Jylla bad haduh hynriew tylli ki block kim don wat tang kawei ka higher secondary school.
“Ka don ka jinghiar ha ka jingdon jong ki skul secondary bad higher secondary. Kumta, donkam ban don ka jingkyrshan kaba kyrpang na ka liang ka sorkar ban kyntiew ia ki skul secondary bad higher secondary” u la ong.
Hapoh kane ka skhim thymmai, ki skul kiba dei hok kin ioh ia ka jingiarap pisa kaba lah ban pyndonkam katkum ka jingdonkam jong ki skul.
“Ka jingthmu jong kane ka prokram ka long ban kyrshan ia ki 1,900 tylli ki skul secondary bad higher secondary. Kane kan ym long ha ka dur jong ki kam nonghikai bala mang(sanctioned post) lane ka tulop ia ki nonghikai hynrei kan long ka jingkyrshan pisa shaki skul” ula ong.
U la ong ba ia kane ka skhim yn pyniadei bad ka jingtreikam bad yn bishar bniah man la u snem.
“Ki skul kiba leh bha kin ioh ia ka jingkyrshan bad ioh kham bun ka jingkyrshan pisa. Ka tnad pule puthi ka dang lum ia ki jingtip ba bniah katkum ki jingai jingmut ba la ai,” ong u Myntri Rangbah ka Jylla haba bynrap ba yn sa pynmih ia ka jingpynbna kaba bniah.
