Shillong, Risaw 31: Ka Joint Action Committee (JAC) jong ka NEHUTA, NEHUNSA bad NEHUSU hynne ka step sngi Ba-ar, kala leit ban pynthut iaka jingialang jong ka Academic Council ka North Eastern Hills University (NEHU) kaba long hapoh ka kamra Conference Hall ha ophis treikam u Vice Chancellor (VC) ka skulbah.
Lah ban kdew hangne, u VC ula khot iaka jingialang jong ka Academic Council hynrei tang hadien katto katne por, ki nongialam ka JAC kila rung shapoh ka Conference Hall kaba don ha ophis treikam u Vice Chancellor (VC) bad kila bthah ia baroh ban mih noh na kane ka jingialang.
Ki nongialam ka JAC ki shim ia kane ka sienjam kum ka dak ban pyrshah halor ka jingkynnoh kuman u Vice Chancellor (VC) ban wengkam ia u Rohit Prasad uba la shah thungkam kum u Consultant bad ban pynbiang iaki jingdonkam haki Hostel, ki dawai haki health center bad kiwei kiwei de.
Kiwei ki jingdawa ki kynthup ban sdang noh iaka GeM ID hapoh ka skulbah, ban pynbiang iaka Fellowship naka bynta ki Research Scholars bad ban kyntiew iaka Non-NET Fellowship.
Haba kren ha kane ka sngi u Chairman ka JAC u Prof. Lakhon Kma uba dei ruh u president ka NEHUTA ula ong ba kam don jingmut ban pynlong iaka jingialang jong ka Academic Council jong ka NEHU namar haduh mynta u VC u khlem pat shim rai eiei halor ki mat jingdawa jong ki samla pule bad ki jingdonkam hapoh ka NEHU.
U Prof. Kma ula ong ba naka liang ka JAC kala rai ban Boycott lane ban nym ia shim bynta bad ki kam hapoh ka skulbah ba khlieh da u Rohit Prasad.
Ula ong baka JAC kam kwah shuh ban iakren eiei halor ka jingdawa wengkam ia u Rohit Prasad hynrei ka kloi ban iakren halor kiwei ki jingdawa namar kumba la sngewthuh, ki don ki mat jingdawa baka NEHU bad u VC kin shimpor ban pynurlong.
