Nongpoh, Naiwieng 01 : Katba ki sngi sha ka elekshon MDC kila nang jan, lai ngut ki nongialam ka NPP na Nongpoh, kila leit ban iasoh ialade sha ka Congress ha ryngkat bad ki nongkyrshan.
Kine ki laingut ki dei u Bah Minsing Makri, Adviser ka NPP Nongpoh Block, Bah Stoin R Syngkli, Working President ka NPP Nongpoh Block bad u Bah Lawrence Nongrum, Secretary barim ka NPP.
Ia kine ki laingut la pdiang burom da ki nongialam ka Congress ba kynthup ia u Bah MG Kharshanlor, President ka Ri-Bhoi District Congress Committee, kong Joplin Scott Shylla, President Meghalaya Pradesh Mahila Congress Committee bad kiwei kiwei, ha ka jingialang ba long ha Nongpoh.
Haba ai jingkren, ki Nongialam ka Congress ki la pynpaw ia ka jingkmen ban pdiang sngewbha ia kitei ki 3 ngut sha ka sem jong ka Congress, bad pynpaw ba ka party congress ka la nang ioh bor shuh shuh da ka jingwan kine ki riew rangbah kiba la khraw haka jingmut jingpyrkhat bad kiba la ih bha haka kam sain pyrthei kiba kum kine ki lai ngut.
