SHILLONG, Iaiong 26: U Myntri Rangbah ka Jylla u Conrad K. Sangma, u la leit ban ia don bynta lang ha ka jingiaseng ban leit ontep ia u kpa bakhuid u Pope Francis ha Vatican mynta ka sngi Saitjain.
Haba ia shim bynta lang bad ki lak ngut ki briew ha St Peter’s Square, u Conrad Sangma u la ai khublei khatduh ia u Pope Francis da kaba ong, “Nga sngew ba nga long uba la kyrkhu shisha ban ia don bynta lang ha ka jingleit ontep ia u Pope Francis. Nga la ioh ka lad ban iakynduh ia u ar snem mynshwa, bad mynta ka sngi, ka long shi bynta jong ka jingleit ontep donburom bad nga sngew ba nga long uba la kyrkhu shibun.”
U Conrad u la ong,” Mynta, wat haka jingleit ontep u la pynia tylli ia ki briew kumba u leh ha ki por ba u dang im. Ki paidbah na kylleng ka pyrthei kila wan ban ai khublei khatduh ia u Pope Francis. Ngin sngew kynjah bad to ai ba ka mynsiem jong u kan shongthait ha ka jingsuk bymjukut.”
Ha ka jingleit u Myntri Rangbah ka jylla sha Vatican, la synran lang da u Officer on Special Duty uba dei ruh u Political Secretary, u Bah Daniel Thangkhiew.
U Sangma u la ia kynduh ia u Pope Francis ha Vatican ha u bnai Nohprah jong u snem 2022, ha kaba u la kyrpad ia une u khlieh duh ban duwai na ka bynta ka jylla ka ri bad khamtam eh na ka bynta ki paidbah.
