Agartala, Nohprah 01:Ki nongtrei bad nongkyrshan jong ka party CPI(M) mynta ka sngi kila pynlong ka jingiakhih pyrshah hakhmat ka headquarter jong ki pulit ka Tripura ban dawa aiti ia ka metiap jong u nongtrei ka party uba la shah pyniap noh hynnin ka sngi bad ruh ban kem noh mardor ia ki runar kiba donkti ha kane ka kam pyntriem.
Hynnin ka sngi Balang, kila don haduh palat 15 ngut ki nongtrei bad nongkyrshan jong ka CPI-M kiba la ngat ha ki jingmynsaw katba uwei pat ia uba la tip kyrteng kum u Sahid Mia 76 snem rta ula khlad noh hadien ba ki nongkyrshan ka BJP bad ka CPI-M kila poi sha ka jingialeh markylliang ha Charilam hapoh Sepahijala district ka Tripura.
“Mynta ngi don ia ka prokram ba ngin shimti ia ka metiap jong u Sahid Mia uba la shah pyniap noh hynnin ka sngi hapoh ka ophis jong ka party CPI-M ka jylla na ka bynta ka jingleh burom ba khatduh bad hadien ngin rah noh ia ka met sha ka shnong ka jong u na ka bynta ka jinglehniam ba khatduh da kaba pynlong ia ka jingiaid paidbah. Hynrei, ki pulit bym larkam ki bym shym la lah ban aijingiada ia ki briew, bad kaba katei ka jingjia kam pyniap ruh kala jia hakhmat jong ki, mynta kila leit ban tuh ia ka met na ka jaka buh metiap jong ka hospital.Da kumne kila pyniap ia ka synshar paidbah.Kumta ruh halor kane ngi la pynlong ka jingiakhih hangne ban dawa aiti ia ka met sha kiba haiing hasem jong u Sahid bad ban kem mardor ia kiba donkti,” ong u Choudhury.
Nalor kata ula kynnoh ruh ba kane ka jingiaumsnam kala wan jia lyngba ka jingiasylla jong ka seng BJP. Na ka liang u para jong utei u lanot ula kam ba hadien ba kila wan poi ha ka jaka buh metiap jong ka GB Pant hospital na ka bynta ban shimti ia ka met, na ka liang ki bor pulit kila thombor ia ki da kaba bom lathi.
“U hymmen jong nga ula khlad noh hynnin ka sngi.La pynkynriah ia u shapoh GB Panth hospital ha kaba la pynbna ba ula dep khlad noh bad la pynkynriah ia ka met sha ka jaka buh metiap jong ka hospital.Ngi la wan hangne ban shimti ia ka met.Kham hadien ki doktor bad ki pulit kila shim ia ki katto katne ki jingsoi kyrteng na ngi bad ong ba kin phah ia kane ka met da ka kali jong ki.Ngi la ong ba ngi la wanrah la ka jong ka kali bad ngin rah ia kane ka met sha ka ophis jong ka party CPI-M bad hadien sha la iing.Hynre ula ong ba na ka liang ki bor pulit kila thombor pynban ia ki bad tuh noh ia ka met na kane ka jaka buh metiap,” ong shuh shuh u para jong utei u lanot.
