Shillong, Nailar 21 : Ki Khlieh Nongsynshar Shnong bad Hima Mawsynram, hynne ka sngi Balang, kila iakynduh ia u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong, ban buddien halor ka jingdawa ban shna pynheh noh ia ka surok na Weiloi sha Balat.
Ia ki Khlieh Nongsynshar la synran da u MDC ka Mawsynram Bah Alvin Sawkmie bad u MLA barim bad Nongialam ka NPP Bah HM Shangpliang.
Haba kren sha ki lad pathai khubor, u MDC ulapyntip ba ha ka jingiakynduh ia u DyCM, la pyntp ba ka Sorkar ka dang pyn khreh ia ka Detailed Project Report (DPR) ban pynkylla noh ia ka surok Weiloi-Balat sha ka surok Intermediate.
Ula pyntip ba ka Sorkar Jylla kan sa pynrung ia kane ka project kum kawei na ki project ka ban bei tyngka da ka World Bank.
“U Symbud Myntri Rangbah ula pyntip ba ka PWD ka dang pynkhreh shaid shaid ba pyndep iaka DPR hynrei katba ka jingpynkhreh ia ka DPR ka dang iaid, ka Sorkar kan sa mang shwa ia ka pisa ban maramot iakane ka surok ” ong u Bah Alvin.
U Bah Alvin ula iathuh baka jingjrong jong ka surok na Mawphlang-Welloi shaduh Balat ka don kumba 80 km bad kadei ruh kawei naki surok kaba rim tam hapoh Meghalaya ia kaba la shna naduh ki por ba ka Ri India kam pat ioh iaka jinglaitluid.
“Lada pynkylla ia ka Surok na Weiloi sha Balat kum ka surok Intermediate, kan longhisha ka jingkyrkhu iaki paidbah khamtam iaki nongrep kiba pynpoi iaki mar rep shaki Iew ki Hat” ula ong.
