Shillong, Nailar 21 : U National General Secretary ka NPP bad Symbud Myntri Rangbah Bah Sniawbhalang Dhar ha ka sngi Balang, ula rai ban pynkut noh ia baroh ki jingia mutdur bad ki jingantad ba ka NPP kan sa weng noh ia ka UDP na ka Sorkar Meghalaya Democratic Alliance (MDA) hadien ba wan iasoh ki 3 ngut ki MLA ka Congress.
U Bah Sniawbhalang ula ong ba ka NPP kan iai bteng ban iatreilang bad ki paralok jong ka Sorkar MDA tang haduh da kut ka samoi treikam ba san snem pura.
Haba iakren bad ki nongthoh khubor, u Bah Sniawbha ula ong “Ngim don satia ia kano kano ka jingthmu ban weng ia uno uno u Myntri lane pynkut ia ka jingiadei bad kiwei pat ki paralok ba iatreilang ha ka MDA tang namar ba ngi la don ia u paid (MLA) ba lah ban synshar marwei. Ngi la iatreilang naduh u snem 2018 bad ngi kwah ban iai bteng ka jingiatreilang tad haduh da kut ka samoi ba san snem bad wat palat ia u 2028”.
Ka NPP kala tam ia u magic nombor da ka jingkot ia ka jingdon MLA sha ka 31 ngut ha ka Iingdorbar ba 59 ngut ki dkhot hadien ba wan iasoh ki 3 ngut ki MLA ka Congress.
Haba pynpaw ia ka jingshaniah jong ki paralok ba iatreilang ha ka MDA, ula ong ‘Wat khuslai, ngin iatreilang da kaba jingkmen bad ki paralok jong ngi bad ngi shaniah ruh ia ki. Namar kata, kan ym don satia kano kano ka jingbujli Myntri watla kala don ka jingkylla ha ka sain pyrthei”.
“Hynrei, hooid lada ki paralok ba iatreilang ki kwah ban pynkylla (bujli ia ki Myntri nala ki jong ki party), kane kan shong eh ha ki, ka dei ka jingkwah jong ki” ula bynrap.
Haba kylli, une u Nongialam ka NPP ula ong “Ngi burom iala ki paralok-ka UDP bad HSPDP- bad ngin iai bteng ban iatrei lang bad ki wat hadien ka elekshon 2028”.
