Shillong, Jymmang 12 : Ka bor district ka East Khasi Hills kala pynmih ia ki kyndon iaid kali ba thymmai shuwa ka jingplie paidbah ia ka Jingkieng Umiam Bypass ha ka 13 tarik Jymmang, bad la pyntip ba yn shah ia ka jingiaid ki kali kamai, kynthup ki bos Night Super na kane ka lynti thymmai na Umiam sha Shillong naduh ka 14 tarik Jymmang.
Ha ka hukum bala pynmih ha ka sngi Ba-ar, u Deputy Commissioner ka East Khasi Hills ula ong ba ia kane ka Umiam bypass ba dang shu dep shna thymmai, yn sa plie noh na ka bynta ka jingiaid ki kali kat kum ki jingpyrrkhing bad ki jingbuh kyndon.
Kat kum ka hukum, ki kali kamai bad ki bos night sumer yn shah ban iaid lyngba kane ka bypass tang hapdeng ka por 9 baje mynmiet haduh ka por 7 baje mynstep manla ka sngi.
Ka bor district kala khang ruh ia ka jingiaid ki kali articulate (ki kali kiba don ia u pivot joint) na kane ka lynti.
Ka ong ba tang ki kali kiba don haduh lai tylliki axle, kiba don artylli ki taiar ha ka axle ba hakhmat bad phra taiar ha ki artylli ki axle ba shadien, yn shah ban iaid na kane ka bypass, kaba shong pat ha ka jingkhia kyllum jong ka kali kaba long haduh 28.5 ton.
Ha kajuh ka por, baroh ki bos Night Super la bthah ba ki dei ban leit pynieng beit hapoh ka Inter-State Bus Terminal (ISBT) ba don ha Mawiong.
Ka hukum ka ong ruh ban ym shah ia ka jingpynieng ia ki bos miet ha SRGT, Polo, ha jaka pynieng kali ka Shillong Municipal Board ba don ha Dhankheti, ha shilynter ka surok Itshyrwat-New Shillong, surok Shillong-Jowai lane ha kano kano ka jaka ha sor lait noh ka ISBT, Mawiong.
Ka bor district ka la bthah ïa ki pulit, ki bor ka tnad Transport, ki heh ka PWD (Roads), NHAI/NHIDCL bad kiwei pat ki tnat kiba don bynta ba ki dei ban pyntikna ïa ka jingpyntreikam kaba pyrrkhing ïa kine ki kyndon ïaid kali kiba thymmai.
