Shillong Risaw 31: U Myntri ka Development of North Eastern Region (DoNER) bad Communications Jyotiraditya M. Scindia, un wan ban buh ia u mawnongrim ban tei iaka Integrated Development of Sohra Tourism Circuit ha Sohra, ha ka 1 tarik Naiwieng ha ka jingia donlang u Myntri Rangbah ka jylla Conrad K Sangma.
Kane ka project kaban shongdor palat T.200 Klur kadei kaba la bei tyngka lyngba ka PM-DevINE scheme bad ka thmu ban kyntiew ia ki jingtei kiba iadei bad ka kam jngohkai, ban pynneh pynsah ia ka kamai kajih bad ban pynneh ia ka Sohra kum ka jaka kaba kyrpang ha ka kolshor bad ka jingdon ia ki jaka kiba naduh hyndai hynthai.
Kane ka jingthmu kan pynleit jingmut ha kaban kyntiew ia ka roi ka par da ki shnong ki thaw, ban thaw ia ki lad iohkam iohjam na ka bynta ki trai shnong bad ban kyntiew ia ka kam jngohkai kaban ym ktah ia ka mariang.
Ki heh ki hain kin leit ban jngoh ia ki dukan kiban pyninam ia ki jingshna tynrai bad kan don ruh ka jingiakren bad kine ki nongseng kam, ki nongthain jingthain kti bad baroh kiba donbynta ha ka kam jngohkai kum shi bynta jong ka jingbuh ia u mawnongrim.
Yn pynlong ruh ia ka prokram paidbah bad kaj ingiakren bad ki lad pathai khubor ha kaban yn batai bniah shaphang kane ka project kaban wanrah ia ka jingkylla ia ka kam jngohkai ha Meghalaya.
U Myntri ka kam jngohkai u Timothy D. Shira ruh un wan ban iashimbynta lang ha kane ka prokram ha ryngkat bad kiwei kiwei ki heh sorkar.
U Scindia un leit ruh ban jngoh ia ka ka Krem Mawmluh ha ka 2 tarik u Naiwieng 2025 bad hadien kane un leit pat sha Guwahati, Assam, ban plie ia ki project kiba kongsan jong ka DoNER bad un leit ruh ban jngoh ia ka IIT Guwahati.
