La pynmadan ia ka jaka ban buh Petrol Pump bad Resort
Nongpoh, K’lyngkot 16: Ka Federation of Khasi Jaintia & Garo People (FKJGP)-North Khasi Hills, kala sei madan ia ka kam sopsop jong ka Sorkar Jylla, kaba la kynnoh aiwai ia ka jaka jong ka Meghalaya Mineral Development Corporation Limited (MMDCL) sha u nong Assam ban buh Petrol Pump bad shna Resort.
Ka FKJGP-NKH hapoh ka jingialam u President Bah Luistar Lyngdoh, kala lap ia kane ka kam sopsop hynne ka sngi Ba-ar, ha ka jingleit jurip ia kane ka jaka, kaba dang don mynta hapdeng ka jingtrei ban pynmadan ia ka jaka da une u briew ba na Assam.
Ka FKJGP-NKH kala pynthikna ia kane da ka jingkhot ia u Rangbah Shnong ka Mawsmai ban ioh jingshai, uba la pyntip ba ka Shnong kala ai No Objection Certificate (NoC) sha uwei u nong Assam ba un buh ia ka Petrol Pump bad shna Resort ha kane ka jaka jong ka MMDCL, kaba la shu ieh shrah da ki phew phew snem.
Haba kren sha ki lad pathai khubor, u Bah Luistar ula pynpaw ia ka jingkyndit bad jinglyngngoh ban ioh jingtip ba ka Sorkar Jylla kala aiwai sopsop ia kane ka jaka sha u nong Assam bad ong ba ka Seng ka pyrshah jur ia kane ka kam.
“Ngi pyrshah jur ia kane ka jingaiwai sha u bar Jylla namar ki don bun bah ki trai Jylla kiba kwah ban shim wai ia kane ka jaka lada ka Sorkar ka thmu ban aiwai” ula ong
“Ha ka jingshisha, ka Sorkar kala dei ban tei da ki jaka pule ne ki Hotel ha kane ka jaka ban ia ka petrol pump ne resort namar kane ka jaka ka dei kaba iajan eh bad ki jaka sumar kiba don marjan ka thain. Lada kam lah ban leh hi, kala dei ban aiwai sha ki trai Jylla ba kin pyntrei ia kine ki jingtei kiba kham kongsan na ka bynta u paidbah” ula ong.
U Bah Luistar ula ong ba ka Seng kan iai buddien bad iai tih jylliew ia kane ka kam bad lad aka shem ba don kano kano ka kam kaba lehrieh ne leh bakla, ka seng kan ym ailad satia.
