Aizawl, Nailar 18 : Ia ki metiap jong ki arngut shi para kiba dei napoh Myanmar la lapdien na ka jaka khlaw hapoh ka shnong Haimual ka ba hap ha ka jylla Chin jong ka Myanmar.Kiba haiing hasem jong kine ki khynnah ki ba dang khie samla ki dei ki ba wan shong riehtngen hapoh ka shnong Zokhawthar ha Mizoram.
Katkum ki khubor la iathuh ba ia ka met iap jong ka khynnah kynthei bad u para jong ka la lapdien na ka jaka khlaw.Ki khubor ki iathuh ba kine ki shipara ki la shah rahbor lane shah kem noh ha ki shipai Myanmar ha ka 14 tarik mynta u bnai hadien ba ka la mih ka jingiakynad hapdeng ki Tatmadaw (shipai Myanmar) bad ki riewialeh pyrshah.
Ki shipai ka Myanmar la ong ba ki la thang dusmon ruh ia ki ba bun tylli ki iing ki sem hapoh ka shnong Haimual ka ba la wanrah ka jingiap jong ki ba bun lyngba ka jingpluh ding.
Ia kitei ki arngut ki lanot napoh Myanmar la tip kyrteng kum ka Lalnunpuii (17) bad u para jong ka, Lalruatmawia (15 snem rta).Kine ki shipara la iathuh ba ki dei ki khun jong u nongialam ka kynhun ialeh pyrshah People’s Defense Force (PDF).
Ka PDF ka la iakhun ia ka thma pyrshah ia ki shipai junta ka Myanmar na ka bynta ban pynneh pat ia ka synshar paidbah hapoh ka ri.
Nalor kata la iathuh ruh ba ia ki metiap jong kine ki arngut ki khynnah la lapdien na ka jingtep ka ba jyndong na katei ka jaka khlaw ha ka sngi ba Ar ba la lah.
Na ka liang ki ba haiing hasem jong kitei ki lanot ki ba shong riehtngen hapoh ka shnong Zokhawthar ka ba hapoh Mizoram ki la leitphai pat sha Haimual hadien ba ki la ioh pdiang ia katei ka khubor ba sngewsih.
Ki jingialeh markylliang hapdeng ki bor shipai ka Myanmar bad ki riewialeh pyrshah Chin National Army (CNA) ka dang iai bteng mynta lah kumba shitaiew ha ka jylla Chin jong ka Myanmar.
