Tura, Naiwieng 28 : Ka jingksam um shapoh ka mei ramew (drilling) ha kawei ka Shnong ha Ri-lum Garo, kala pynmih pynban ia ka ding kaba klang bha na shapoh khyndew ia kaba la suba ba ka lah ban dei ka par umphniang ne gas.
Kane ka jingjia kala jia hynnin ka sngi U Blei ha ka por 3:30 baje ha shnong Aragittim, kaba jngai kumba 5 km na Mahendraganj Police Station, South West Garo Hills District.
Ki bor sorkar ki pyntip ba ka ding kala mih na shapoh ka mei ramew katba ki nongtrei ka PHE bad ki Technician ki dang ksam ia ka khyndew ban wad ia ka tyllong um jong ka skhim Jal Jeevan Mission (JJM).
Ha ka por ba dang ksam ia ka khyndew, ka ding kala mih na kane ka thliew lehse ka lah ban dei ka jingdon jong ka umphniang petroleum.
Haba ioh jingtip ia kane, ki kali pynlip ding na Mahendraganj Fire & Emergency Service kila leh ban iakhun ia kane ka ding bad hadien katto katne por kila lah ban pynlip noh ia ka.
Ka jingsuba ba dei ka mar petroleum kala nang khlain haba sakhi ia ka jingmih jong ka sboh na kane ka thliew hadien bala pynlip ia ka ding.
Ia kane ka jaka la ker kut noh da ki Pulit bad ki stad ki jhad na ka Ministry of Oil and Petroleum kiba ju khmih ia ka kam tih umphniang, kin sa wan poi ha kine ki khyndiat sngi ban tohkit bniah ia kane ka jingsuba ba dei ka umphniang crude oil.
