Bongaigaon, Naiwieng 28 :Ki pulit ka Assam hynnin ka sngi U Blei kila kem noh ia uwei u briew halor ka jingkynnoh donkti ha kaba iadei bad ki kam khaii drok napoh Bongaigaon district ka Assam.
Ia une u nongkhaii drok la tip kyrteng kum u Govind Sharma uba la shah kem noh na ka jaka iew FCI ha Jogighopa hadien ba ki bor pulit ka Bongaigaon kila pynlong ka jingkhynra hadien ba kila ioh pdiang ia ki jingtip kiba bniah.
Ha kane ka jingkhynra ki pulit kila ioh ban kurup ba une u nongkhaii drok kumba 119 tylli ki dawai kuli pynbuaid ha ryngkat ka mobile phone.U Sharma la kynnoh ba ula pyniaid ia kine ki kam khaii drok lyngba ka dukan fast food.
Ia katei ka jingleit khynra la lamkhmat da u pulit inspector na Jogighopa police station u Dinanath Mili nalor u officer-in-charge u Sukhesh Ghosh. Ka jingtohkit mynta ka dang iaid shakhmat.
Ha kawei pat ka jingjop ban khanglad ia ki kam khaii drok, ki pulit ka Assam ha ka 23 tarik mynta u bnai kila ioh ban kurup haduh 400 gram u drok heroin ia uba la thep ha ki synduk sabon na ki bynta jong ka sor rit Silchar ka Assam.
Katkum ki khubor la ong ba ka kynhun ki pulit hapoh ka jingialam jong u Additional Superintendent of Police (ASP) ka tnat Crime Branch, u Kalyan Kumar Das kila pynlong ka jingpynap shrip bad pynlong ka jingkhynra ia kawei ka kali hadien ba kila ioh ban kurup ia utei u drok.
Ha kane ka jingjia ki pulit kila kem noh ruh ia arngut ki nongkhaii ia kiba la tip kyrteng kum u Shahid Mohammad Laskar bad u Shawhaz Hossain Majumdar kiba dei na ka thain Madhurbandar kaba hapoh Silchar.
Kine ki briew kiba la shah kem noh la ong ba kila wan kit ia une u drok na ka jylla ba marjan napoh Manipur.
Katkum u Superintendent of Police (SP) ka Cachar, u Numal Mahatta la ong ba une u drok ba la ioh kurup u shongdor kumba T.40 lak ha ki jaka iew ka pyrthei.
Shuh shuh ha kawei pat ka jingioh kurup drok, ki pulit ka jylla ha ka 21 tarik mynta u bnai kila ioh ban kurup 15.38 gram u drok uba shongdor kumba T.10 lak na ki bynta jong ka Hailakandi district ka Assam.
