Tura, Nailar 26: Ka Tura kala lamkhmat mynta ban wanrah ia ka jingkylluid jong ki surok bad lynti iaid kjat kiba khapngiah da ki nongshongdukan madan hadien ba ki bor District kila shim ia ka rai ban pynkynriah noh ia baroh ki dukan madan sha ki jaka bala ithuh ha sor Tura, ba kin iadie iathied khlem kino kino ki jingpynthut ia ki nongiaid nongieng bad ki kali.
Kane ka rai ban pynkynriah noh ia ki dukan madan ka dei kaba la shim hynne ka sngi thohdieng ha ka jingialang High Level bala pynlong da u Deputy Commissioner Swapnil Tembe ha Conference Hall jong ka DRDA.
Ha kane ka jingialang la wan iashimbynta da ka CEO ka Tura Municipal Board ka Rikse R Marak, ki Dkhot jong ki Area Development Committee, ki seng jong ki Nongkhaii ia ki jait mar bapher bapher, ki nongialam jong ki seng ki nongdie dukan madan bad ki Pulit ka West Garo Hills.
Ki artylli ki mat bala iakren ha ka jingialang ki kynthup ia ka jingpynkynriah noh ia ki dukan madan sha ki jaka bala ithuh ban shong dukan madan bad ka jingpynthymmai ia ka dor ka mur jong ki mar ki mata.
Ki Nongiashimbynta na ki kynhun bapher bapher kila kren halor ki jingeh ba ki iakynduh na ka jingkiew dor ki mar ki mata bad ka jingkhapngiah jong ki surok bad ki lynti iaid kjat namar ka jingbym jaka ia ki nongshongdukan madan ba kin die jingdie.
La pyntip ia ki nongwan jingialang ba ka daw ka jingkiew dor ki mar ki mata ka dei namar ka jingdon jong ka kynhun ki khwan myntoi shimet kiba pynbor ia ki nongkhaii ban pynkiew dor khnang ba kin ioh kamai commission na ki mar ba die.
La rai ha kane ka jingialang ba yn pynkynriah noh ia ki nongshongdukan madan sha ki saw tylli ki jaka ba ladep ithuh ha Tura-Ka Tura Urban Hub kaba dang lait sa 80 tylli ki dukan, ka Iew die doh ha Araimile kaba dang lait 35 tylli ki dukan, ka Nazing Bazaar kaba dang lait kumba 25-30 tylli ki dukan lem bad ka Tura Housing Complex ha Dakopgre kaba dang lait sa 25-30 tylli ki dukan ban pyndonkam.
La kyntu ia ki Nongshongdukan madan ba kin leit sha ka Ophis u DC bad register ialade ha ka Ophis ka DRDA ha lane shuwa ka 15 tarik Nailur kaba dei ka sngi ba khatduh.
Haba kren ha ka jingialang, u Deputy Commissoner Swapnil Tembe ula kyntu ban sdang noh ia ka jing pynmlien ban iaid kjat namar ki surok bad ki lynti iaid kjat kin sa kylluid naka jingbym don shuh ki nongshong dukan madan.
Ha ka jingiakren, kiba bun ki briew ba mihkhmat na ki kynhun bapher bapher kila kdew ia ki jingeh haba phai sha ka jingsniew jong ki lynti iaid kjat kaba buh jingma ban iaid ban ieng namar ka jingbun ki thliew ki snar.
Kila pynsngew ruh ia ka jingsngewkhia halor ka jingdie ia ka doh kaba la ot bad wanrah na shabar jong ka Sor khlem da don licence ne khmih bniah da ki Food Inspector bad ruh ia ka jingdon bun palat ki wine store ha kylleng ka sor ia kaba dei ban pynkynriah noh shabar ka sor.
U Deputy Commissioner ula ai ka jingkular ba la dep bthah ia ka Tnad PWD ban peit ia ka jingeh haba iadei bad ka jingsniew ki lynti iaid kjat katba ia ka TMB bad ki Pulit la pynkhamti ba kin khmih ia ka jingdie pathar ia ka doh bad kiwei kiwei ki mar kiba wan na shabar ka sor Tura.
Haba iadei bad ka jingpynkyniah ia ki wine store, u DC ula kyntu ba kin leit buh da ka jingujor sha ka Tnad Excise ba kan leh ia kaba donkam.
