Shillong, Naitung 09: Ka Mawlai SC ka la ioh ban pynliem haduh 4-0 kol ia ka Malki Sports Club ha ka jingiakhun kaba 16 kaba dei ruh ka kylla kaba khatduh jong ka Shillong Premier League kaba long ha kane ka janmiet sngi Saitjain ha madan Third Ground Polo.
Da katei ka jingjop mynta, ka Mawlai ka la ioh ban bat ia ka kyrdan kaba ha jrong duh jong ka miej ia kheiñ point da ki 12 point bud pat sa ka Ryntih da ki 9 point.
Ia ki kol jong ka Mawlai ha kane ka sngi la ioh ban thep da u Donlad Diengdoh tang ha ka minit kaba 10, nangta u Samuel Lyngdoh Kynshi ha ka minit kaba 27 bad 74 bad ia kawei pat ka kol la ioh ban thep da u Remark Kharmalki ha ka minit kaba 58.
Kane kadei ka sien kaba nyngkong eh ban sakhi ba ka kynhun ha katei ka lympung kan ioh ban jop bun kol eh.
Ha kane ka sngi la iohi ba watla ka Malki ka iakhun tyngeh hynrei kam shym la ioh ban pynphai wat tang shi kol ruh tad haduh ban da kut ka por ialehkai.
Ka jingiakhun ha ka sngi Nyngkong pat kan long hapdeng ki kynhun kiba don sha trai duh, kata hapdeng ka Shillong Lajong FC bad ka Mawkhar SC ha ka por 4baje janmiet.
