Shillong, Naitung 9 : U nongialam ka Liang Pyrshah ha Ïing Dorbar Thawaiñ ka Jylla, Dr.Mukul Sangma ha ka sngi Saitjaiñ u la kynthoh tyngeh ia ka sorkar jylla ba ïalam da ka NPP da kaba ong ba kane ka sorkar kala khanglad ia ki samla ka Jylla ha kiba bun ki liang.
Haba kren ha ka jingialang paidbah jong ka AITC kaba long ha Asanang, West Garo Hills u Dr Mukul Sangma u la ong ruh ba ka jinglong jingman ha kane ka sorkar MDA ka long ka bym itynnad satia.
Da kaba kam ba ka don ka jingkhihwin ha ki samla, u Dr. Mukul u la ong, “Balei ka sorkar MDA ka khanglad ia ka samla ban ioh ia ki kam kiba dei hok ban ioh. Ka dei ia ka Sorkar ban pyrkhat lem ia baroh ki samla haba phai sha ka iohkam iohjam. Baroh kiba angnud ban iohkam ki dei ban ioh ia ka jingkyrmen kaba ki donkam lem kumta kan long ka jingma?”.
Ha kajuh ka por u la buh jingkylli ia ka jingpyntrei ia ka surok na Dainadubi, Damra Mendipathar, Resubelpara, da kaba ong, “Mano ba khang ia ka sorkar jylla ban pyndep noh ia katei ka surok ba bei tyngka da ka World Bank kaba naduh u 2017. Kumjuh ruh ia ka surok Rongram sha Phulbari kaba 132 klur namar u kontraktor ba pyntrei ia lane dei uba pyntrei ia ka Meghalaya Legislative Assembly. Ka jingpyllait pisa sha u contractor kam ia wan shuh bad ka jingpaw ka kam. Na ka ka dor jong ka projek haduh 77 klur tyngka la dep ban pyllait wat la ka kam pat kam pat kot tang 30 persen.”
Ha katei ka jingialang la poi haduh kumba 80 ngut eiei ki paidbah kiba pynpaw ia ka jingai jingkyrshan ia ka Trinamool Congress.
