Shillong, Iaiong 01 : Uwei u Rangbah ula lait salit na ki jingma, ha ka jingshah rong ha ka umsaw jong ka Wah Umkhrah hynnin ka sngi ha ki thain Polo.
Ka jingwan lynshop kynsan u lapbah khamtam ha Nongbah Shillong, kala wanrah ia ka jingdap um ym tang ki lynti iaid bad ki surok hynrei kala wanrah ruh ia ka jingkiew um kynsan jong ki Wah khamtam ha Wah Umkhrah.
Ha kane ka jingkiew um, uwei u rangbah ula hap hapoh ka Wah Umkaliar bad shah rah ha ka umsaw hynrei donbok ba kane ka jaka kam dei kaba jylliew bad ba khlainbor ha ka jingtuid (current), une u rangbah ula lah ban ialeh bad poi sha ka jaka ba shngain.
Ki paidbah kiba sakhi ia kane ka jingjia, kila leit ban ai jingiarap mar mar ia uneu rangbah ba un lait na ka jingshah rong ha kane ka wah.
La iohi lyngba ka Video ba ia une u rangbah la lah ban iarap noh da ki paidbah daka ba tan ia u da u seij bad ula lait naka jingjia ba sngewsih.
