Nongpoh, Jylliew 23: Uwei u Rangbah ula shu lait salit na ki jingma bad jingshah lute ha ka kynhun ki runar ki bym lah satia ban ithuh, kiba la pyrshang ban thombor ia u hynne shiteng sngi jong ka sngi palei ha ki thain Amjok, Byrnihat, Ri-Bhoi District.
Kat kum ka khubor Pulit, une u Rangbah u kyrteng u Sahil Jaman Passah, uba dang iaid lynti sha iing hadien ka jing wan sei pisa na ka Bank of India ba don ha Amjok Byrnihat.
Ki pulit ki iathuh ba arngut ki runar kiba wan da ka thuk thuk pulsar 220cc, kila knieh jynthet ia ka pla thep pisa ba une u Rangbah u rah hynrei donbok ula lah ban iakhun bad khlem ai lad ia kine ki runar ba kin ioh rong ia ka pla.
Ki Pulit ki iathuh ba kine ki runar kila phet bak na kane ka jaka hynrei une u Rangbah ula kthong kylla bad da ka jing iarap lang jong ki paralok, kila lap ia kane ka thuk thuk ha 15 mer Byrnihat bad ioh bat ruh ia uwe u briew katba uwei pat ula ioh ban phet krad.
Ia une u briew bala ioh ban kem da ki paidbah la aiti noh sha ki Pulit ka Byrnihat Police Station kiba la kurup noh ruh ia ka thuk thuk Pulsar ba don u nombor AS13 M 9065 ba pyndonkam da kine ki runar.
Une u Rangbah ula ujor ia ka ejahar hapoh ka thanad bad ka jingtohkit mynta kala iaid shakhmat ban thwet bad kem ia uwei pat u runar ba lait phet.
U Secretary Shnong ka Amjok bah Rajesh Lapang uba la poi lang sha Byrnihat Police Station haba iakren bad ki nongthoh khubor, ula ong ba kum kane ka jingjia thmu lute haba shit haba shai, kam dei satia ka jingjia ba dang jia ha ka sien nyngkong hynrei kaba la jia na ka por sha ka por.
Kat kum ka jingong jong u, dang Shen uwei u Rangbah ula duh ei ia ka pisa ba kot T.2 lak ha kum kane kajuh ka rukom lute.
Ka bor Shnong kala kyntu ia ka Tnad Pulit ba kan shim khia ia kum kine ki jingjia bad ban buh ia ki Pulit pahar ha ki thain Amjok, kaba dei ka jaka ba hui hui bha ha ki thain Byrnihat bad ba don bun ki bank ba treikam ha ka thain khnang ban tehlakam ia ki runar kiba ju pyntriem ialade na ka por sha ka por.
