Shillong, Jylliew 23: Ki Ophisar Indian Police Service (IPS) ba pass ha u snem1973, kila pynlong ia ka jingiakynduh lang hynne ka sngi ha Nongbah Shillong.
Kine ki Ophisar kiba la wan ryngkat bad la ki jong ki kurim na ki Jylla bapher bapher ka Ri, kila iakynduh hapoh ka Headquarter jong ki shipai Border Security Force (BSF) ha Shillong.
Haba ai jingtip ia kane, u Ophisar IPS RK Johri ula ong ” Namar ka jinglynshop ka khlam Covid-19, ngi ju iakren para mangi tang na ki rynsan social media bad WhatsApp, hynrei da kane ka jingiakynduh lang, ngi la ioh ka lad ban iakynduh markhmat iwei ia uwei ha ka rukom kaba dei. Ngi ioh ia kane ka kabu hadien bun bun snem bad kane hi ka dei ka thong jong kane ka jingiakynduh lang”.
Nalor kane, ula ong ” Bun na ngi ngim pat ju poi sha Meghalaya hynrei ngi la shu ioh sngew shaphang ka Meghalaya bad iohi ia ka jingitynnad ka Jylla tang ha ki dur bad ki video. Mynta ngi la ioh ia ka kabu ban iohi dala ki jong ki khmat ia ka jingithiang jong kane ka Jylla”.
