Guwahati, Jylliew 23 :U MP ka Seng Congress ha Assam, u Gaurav Gogoi hynne ka sngi u la kynthoh tyngeh ia ka BJP da ka ba ong ba u Myntri Rangbahduh (PM) Narendra Modi u dei ban leit jngoh ia ka Assam ka ba la shah ktah ha ka jingshlei um ha ka jaka ban pynleit jingmut ha ka ba pynkhyllem sorkar ha Maharashtra.
“Ka BJP ka la matlah namar ka bor. Ka jylla Assam ka la ngat ha ka jingshlei um ka ba shyrkhei, u PM u dei ban leit jurip ia kane ka jylla bad pynbna ia ka song jingiarap, pynban u la bunkam ha ka ban pynkhyllem ia ka sorkar ha Maharashtra lane ha ki ilekshon hapoh Gujarat. Tang ka bor ka ba kongsan na ka bynta ka BJP,” ong une u MP ka Seng Congress.
Ka jinglong jingman na ka jingshlei um ha Karimganj district ka Assam ka la nang hiar arsut hadien ba ki um na ka wah Kushiyara, Longai, bad Singla ki la pynshlei shuh shuh ia ki ba bun ki jaka hapoh ka district bad ktah ia palat 1.34 lak ngut ki briew. Ka jingshlei um ka la pynngam ruh ia ki ba bun ki lynti surok hapoh ka district.
Haduh kumba 12.30 lak ngut ki briew ki la shah ktah jur ha ki bynta ba sha them jong ka Assam ha Barpeta district, 4.69 lak ha Darrang, 4.40 lak ha Nagaon, 3.38 lak ha Bajali, 2.91 lak ha Dhubri, 2.82 lak ha Kamrup, 2.80 lak ha Goalpara, 2.07 lak ha Cachar, 1.84 lak ha Nalbari, 1.51 lak ha South Salmara, 1.46 lak ha Bongaigaon bad 1.34 lak ngut ki nongshong shnong ha Karimganj district.
