Nongpoh, Jylliew 26: U wei u koidi ba dang shah tian bishar hapoh ka Judicial Custody u la lait phet syndet na kti ki pulit ka Ri Bhoi District ha ka por ba ki pulit ki dang ïalam leh medical checkup ha ki doctor ka Nongpoh Civil Hospital.
Katkum ka jingtip ba la ïohlum, kane ka jinglait phet u tei u koidi ba la tip kyrteng u Rajit Khongngian ba na ka shnong Pahamriñiai, ka la jia ha ka por 1 baje shiteng sngi. La ïathuh ruh, ba ïa u tei u koidi la synran na District Jail, Mawsyntai da arngut ki pulit ha ryngkat u wei u nongtrei jong katei ka district jail ha ka por ba u ne u koidi u la lait phet na katei ka Hospital.
Na ka liang ki bor pulit ka Ri Bhoi District, ka la bthah ïa ki bor ka pulit Reserve bad Nongpoh Police Station ban thwet ïa u tei u koidi hynrei haduh ba thoh ïa kane ka khubor ki pulit kim shem la lap satia ïa u tei u koidi ba la lait phet.
Pule ruh: Iakynduh ka HBDRF ia u CM, dawa ban pynhap biang ia ki 36 shnong na Block-I sha Meghalaya
