Nongpoh, Nailur 18: Hadien ka jingkhlad noh jong u Syiem Donatus Shadap kata hadien shibnai eiei, ka Kur Shadap Long Syiem jong ka Raid Iapngar ka la jied ne thung thymmai ia u Pherbiang Shadap kum u Syiem ba pura ka Raid Iapngar kaba hap hapoh ka Hima Khyriem.
Ia u Pherbiang Shadap la pynspong Syiem pura da ki kñi baroh kumjuh ia ka Sanad la aiti ha kane ka sngi da ka ophis u Lyndoh ka Raid Mawshai, hadien ka jingpyndep ia ki rukom baroh bad ruh da ka jingiahunlang ne ka jingiatip lang jong ka Kur Shadap Longsyiem ka Raid Iapngar, ha kaba la wan ban sakhi lang ruh da ki Longsan Mansan, ki Lyngdoh bad ki Myntri jong ka Hima Khyrim, ki Raid bad ki nongïalam shnong.
U Lyngdoh ka Hima Khyrim Bah Markanroi Lyngdoh, haba kren ha kane ka sngi pynskhem Syiem, u la pynpaw ka jing sngewkmen kaba khraw ba kum ka Raid ka ioh pat ia ka jingjied bujli thymmai ïa u Bah Pherbiang Shadap kum u Syiem jong ka Raid Iapngar hadien ka jingkhlad noh jong u Paiem D Shadap u ban shimti ban pyntyllun ïa ka lyngkor bad ban synshar ïa ki khun ki hajar jong ka Raid katkum ka riti jong ka jinghiar pateng na ka kur Shadap.
Une u Syiem thymmai ula ioh ruh ia ka jingkitbok kitrwiang bad ki jingkyntu kynpham na ki Myntri, ki Lyngdoh, ki Basan jong ka Raid bapher bapher ba un lah ban synshar bad wanrah ia ka jingtylli hapdeng ki khun ki hajar jong ka Raid Iapngar baroh kawei.
