Shillong, Jymmang 15 : U Myntri Rangbah ka Jylla Conrad K Sangma ha ka sngi Palei ula ong ba ka Jylla kan pyntreikam ia ki lad pynduna ia ki jingpynlut kaba iaid ryngkat badka jingbthah jong u Myntri Rangbah Duh Narendra Modi, haba ban jur ba kane ka sienjam ka dei kaba la leh da ka jingthmu ban long kaba la pynkhreh ia ka jinglong jingman ka bym thikna ha ka pyrthei ym namar ka jingsheptieng.
“Hooid, kumba ngi ngi iatip baroh ia ki jingeh kiba iakynduh da baroh ki ri ka pyrthei, ngi hap buh ha ka jingmut jingpyrkhat ïa ka jinglong jingman jong ka pyrthei mynta bad ka thma kaba dang ïai bteng haduh mynta kaba la pynlong ïa ka jinglong jingman kaba ym shngain ïa ngi,” ong u Conrad haba iakren bad ki nongthoh khubor.
Ula pynpaw ba ka India ka dang iai long ka jaka kaba kham biang ban ia kiba bun ki ri. “Ka khubor na u Myntri Rangbah Duh ka long halor ka jingpynkhreh, ym ka jingsheptieng. Kumba ong ki Heh Ophisar ka Sorkar India, ka Ri ka dang don ia ka stock kaba pahuh haba phai sha ki mar pynmih bording” ula ong.
“Kaei kaba kongsan ka long ba ngim lah ban kheinsting bad namar ba ka jingbym long shngain ka pyrthei, ka long kaba kongsan ia ngi ba ngin tip shaphang kiei kiei baroh bad kham kongsan eh ban pynthikna ba ngi shim ia ki sienjam ban pynkhreh ia kaei kaba sniew na kiba sniew tam bad nga tharai kane ka dei ka khubor ba u Myntri Rangbah Duh ula pyrshang ban pynsngew sha baroh ki nongshongshnong jong ka Ri” ula ong.
“Kam dei ba ngi khniot ia u budam ka jingsheptieng ban ong ba ngi don ha ka khep kaba jynjar bha, em, kam long kumta, ka jingshisha ka long ba ngin long kiba la pynkreh ia ka khep kaba jynjar bad nga tharai ba ngi dei baroh ban sngewthuh ia kata bad kum ki nongshongshnong jong ka ri, ka dei ka kamram jong ngi iwei pa iwei ban leh iala ka bynta ha kaban pynthikna ba kum ka Ri ka long kaba la pynkhreh ia kata”.
U Conrad u iathuh ba u Myntri Rangbah Duh ula bthah ia ki Jylla ban shim ia ki lad ban pynduna ia ki jingpynlut bad kyntu ia ki nongshongshnong ba kin ai ka jingiatreilang.
“U Myntri Rangbah Duh ula ai ia ka rai bad bthah ia baroh ki Jylla ba kin pynthikna ba ngin shim ia ki lad pynduna ia ki jingpynlut bad kyrpad ruh ia ki nongshongshnong. Nga ruh nga shim ia kane ka kabu ban kyntu ba hooid kat kaba lah, ngi sngewthuh ba baroh ki don iala ki jingdonkam bad la ki jong ki jingthmu hynrei kat kaba lah, ngi kwah eh ba ngin ia bud ia kine ki kyndon bala buh da u Myntri Rangbah Duh” ula ong.
U iathuh ba ula dep shim ia ka sienjam da kaba pynduna iala ka jingbuh ia ki kali bad ki briew ba synran ia u (convoy). “Wat ia ngi, ha ka jingshisha, Ia ki kynhun pahara jong nga ruh lah pynduna bad ka jingdon ki kali ba synran ruh kumjuh. Ha Shillong ngim ju iaid convoy kat kum ka protocol hynreii ngi la pynduna hi ia ki kali bad mynta ngin nang pynduna shuh shuh” ula ong.
Ula bynrap ba ka Jylla kala pynshlur ban pyndonkam noh da ki kali Electrik . “ Hooid hapoh ka ri kala don ka sienjam ban pyndonkam noh ia ki kali elektrik. Ngi kyntu ia baroh ba kin iasdang pyndonkam noh da ki kali elektrik bad kane kan dei ka sienjam kaba kongsan bha”.
Ula pyntip ba ula pule bniah ruh halor ka jingpyndonkam ia ki generator ba pyndonkam da ka ethanol. “Nga kwah eh ban khmih ia kine ki generator. Nga la pule katto katne ha kaba ngin lah ban don ia ki generator ba pyniaid da ka ethanol bad kane ka technology kala don mynta ha ka pyrthei. Kumta, ngi sngew jur ba lada ngi lah ban don bun ki generator jong ngi kiba pyniaid da ka ethanol, nga tharai kane kan dei ka sienjam kaba biang eh” ula ong.
U Conrad ula mynjur ba kine ki sienjam ki lah ban ktah ia u paidbah hynrei ula pan pat ia ka jingkyrshan bad ka jingiatreilang.
