Guwahati, Naiwieng 01 :U Myntri Rangbah (CM) ka Assam u Himanta Biswa Sarma hynnin ka sngi Nyngkong sa shisien pat ula buh ka jingkyrpad ia u nongialam ba hakhliehduh ka kynhun seng lehnoh ULFA (I) u Paresh Baruah ba un wan ban pyniasoh ia lade sha ka lynti wad jingsuk na ka bynta ka roi ka par jong ka jylla Assam.
Haba kren ha ka jingialang ha kaba na ka liang ka sorkar kala ai ia ka jingiarap pisa kaba tang shisien sha ki dkhot barim jong ki kynhun seng lehnoh bapher bapher ha ka nongbah Guwahati, u Sarma ula ong; “Nga kyrmen ba kane ka sngi kaba itynnad kum mynta, ngin lah pyniaid shakhmat ia ki lynti wad jingsuk bad ka ULFA (I).Sa shisien pat Nga buh ka jingkyrpad ia u Paresh Baruah ba kam dei lyngba ka jingiaumsnam lyngba lyngba ka jingsuk bad ki jingiakren kiba ngin lah ban tei pat ia ka Assam bad ia ka imlang sahlang ha ka jylla hi baroh kawei.”
Ha kane ka jingkyrpad sha u Baruah, u Sarma ula ong ruh; “Ngin lah ban weng noh ia baroh ki jingeh hapdeng jong ngi lyngba ka lynti jong ka jigiakren.”
Nalor kata ula ong ruh ba ia ka ain kaba aibor kyrpang ia ki bor shipai ne ka Armed Forces (Special Powers) Act la weng noh na 65% ki jaka ha ka jylla namar ka jingwanphai jong ka jingsuk bad ba ka sorkar ka don ruh ia ka jingthmu ban weng noh ia kane ka ain napoh Karbi Anglong district bad na Lakhipur sub-division hapoh Cachar district.
