Shillong, Nailar 12 : Ki nongialam ka United Democratic Party (UDP) hapoh ka jingialam u Myntri Sorkar Bah Lahkmen Rymbui, kila kyrpad ia u Myntri Kam Pohiing ka Ri Amit Shah bad ka Sorkar Pdeng ban pynkloi ha kaban ai jingmynjur ia ki ishu ba sahteng la slem jong ka Jylla, kynthup ka Meghalaya Residents Safety and Security (Amendment) Bill, 2020 bad pyntreikam ia ka Inner Line Permit.
Haba kren sha ki nongthoh khubor ha ka sngi Balang, u Bah Rymbui ula ong ba ka MRSS (Amendment) Bill, 2020 ka dang sahteng sah wat hadien bala mynjur da ka Iingdorbar Thaw Ain bad phah sha u Lat, uba la phah pat ia ka sha ka Home Ministry.
“Ngi tip ba ka MRSSA Bill, 2020 ka dang sahteng wat hadien bala mynjur da ka Iingdorbar Thaw Ain bad phah sha u Lat, bad u Lat ula phah sha ka Home Ministry. Kumta, ngi la kyrpad ia u Myntri kam Pohiing ban khmih ia ka khnang ba ngin ioh noh ia ka jingmynjur” ong u Bah Rymbui.
Kat kum ka jingong jong u, u Amit Shah ula ai jubab ba ki don “lai lane lai tylli ki mat kiba ka Jylla kan hap ban pynbeit, hadien kane, ka Sorkar pdeng ka lah ban ai jingmynjur” bad bynrap “Ngim pat tip kiei kita ki mat tad haduh ba kin da phah sha ngi. Hadien ba ngi la ioh pdiang, ngin sa tip kiei kita ki mat bad ngin sa iakren ia ki”.
Halor ka jingdawa ia ka ILP, u Bah Rymbui ula ong ba ia kane ka kam la iakren bniah bha. “Ngi la iakren halor ka resolution jong ka ILP”. Ula pyntip ba “Ia ka ILP yn hap ban khmih bniah namar ka dei kaba donbynta ki Jylla bapher bapher. Kumba phi tip, ngim dei kiba long marwei. Ngin sa nang kren ia kane ka kam na kawei ka por sha kawei pat”
Ula pyntip ba katba ka Sixth Schedule, Land Transfer Act bad kiwei ki ain ki ai jingiada, “da ka jingiaid ka por, ngi sngewthuh ba ngi dang donkam kiwei ki ain ban iada ia ki trai ri trai muluk jong ka Jylla”.
Ka kynhun kala ban jur ruh halor ka jingpynrung ia ka ktien Khasi bad Garo ha ka khyrnit ba phra jong ka riti synshar ka ri.
“Ngi la kren ia ki ishu kynthup ka jingpynrung ia ka ktien Khasi bad Garo ha ka khyrnit ba phra ka riti synshar ka ri. Halor kane, u Amit Shah ula kular ba ki kam kila nang iaid bad ngi kyrmen ba kin sa pynurlong bad ba ngi dei ban long kiba iai shah” ong u Bah Rymbui.
Ka jingslem ban pynkynriah ia ka Them Metor na Them Iew Mawlong ruh ka dei kawei ka mat ba la iakren. Ula iathuh ba ka Sorkar kala buddien ia kane ka kam naduh u snem 2018-19 bad mynta ka donkam ia ka jingai jaka ki shipai ban lah pynbeit noh.
“U Amit Shah ula mynjur ba kala don ka jingiakren bad ki bor ka tnad iada ri ba ha kano ka rukom kin lah ha kaban ai ia ka jaka ki shipai na ka bynta kane ka kam” ula iathuh.
Ka UDP kala kyrpad ruh ban pynkylla ia ka ain ka ban ai ia ka kyrdan rit paid ia ki nongbud jong ki niam tynrai kum ka Niam Khasi bad Niamtre.
U Bah Rymbui ula kdew ba katba ki Muslim, Khristan, Budhist bad Jain kila ioh ia ka jingithuh kum ki ritpaid, ki niam tynrai ha Meghalaya kila don shabar na ki jingioh jingmyntoi.
 hapoh ka jingialam u Myntri Sorkar Bah Lahkmen Rymbui, kila kyrpad ia u Myntri Kam Pohiing ka Ri Amit Shah bad ka Sorkar Pdeng ban pynkloi ha kaban ai jingmynjur ia ki ishu ba sahteng la slem jong ka Jylla, kynthup ka Meghalaya Residents Safety and Security (Amendment) Bill, 2020 bad pyntreikam ia ka Inner Line Permit.){kind=link}